Օֆշորային սկանդալի հայտնի գործով 16 տարվա ազատազրկման դատապարտված, ադամանդագործ Աշոտ Սուքիասյանի եւ նրա պաշտպանները դիմել են Վերաքննիչ դատարան։ Այս մասին այսօր՝ դեկտեմբերի 11-ին, լրագրողների հետ զրույցում հայտարարել են գործով պաշտպաններ Կարեն Հակոբյանը եւ Յուրա Խաչատրյանը։ Նրանք պահանջում է բեկանել Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանի դատավճիռը եւ Սուքիասյանին ճանաչել ամեղ կամ բողոքը մերժելու դեպքում` փոփոխել դատավճիռը, նշանակել ավելի մեղմ պատիժ կամ ամբողջությամբ բեկանելով ուղարկել ստորադաս դատարան` նոր քննության:
«Բացակայում է դատավճռի պատճառաբանական մասը, բացարձակապես չկան հիմնավորումներ, թե ինչ փաստական տվյալների վերլուծության արդյունքում է պարզվել, որ ի վերջո անձը կատարելու է քրեական օրենքով արգելված արարքներից որեւէ մեկը։ Պահանջները ներկայացված են մի քանի ուղղվածությամբ, այդ թվում հիմնական պահանջը արդարացման պահանջն է, որովհետեւ նման դատական ակտը բացառում է մեղադրական դատավճռի կայացումը մեր օրենքի պահանջից ելնելով, մասնավորապես չի թույլատրվում առանց որեւէ պատճառաբանության դատապարտել անձին, դա բխում է եւ մեր Սահմանադրությունից եւ քրեադատավարական օրենսգրքից եւ նաեւ միջազգային նորմատիվ ակտերից այդ թվում Մարդու իրավունքների եվրոպական կոնվենցիայի պահանջներից»,–հայտարարել է Կարեն Հակոբյանը։
Գործով մյուս պաշտպան Յուրա Խաչատրյանն էլ նշել է, թե միտում է նկատում, որ ստորադաս դատարանները չեն կիրառում Վճռաբեկ դատարանի որոշման մեկնաբանությունները. «Նկատվում է տենդեց, որ ստորադաս դատարանները չեն կատարում Վճռաբեկ դատարանի որոշման մեկնաբանությունները, դրույթները չեն կիրառում եւ սուբյեկտիվ կամավոր որոշումներ են ներկայացնում։ Դրա վառ օրինակը մեր պաշտպանյալի վերաբերյալ գործն է։
Վճռաբեկ դատարանը տվել է մեկնաբանություն՝ որ դեպքում պետք է կիրառվի խարդախության հոդվածը, որ դեպքում է առկա խարդախության հանցակազմ եւ շատ պարզ բացատրություն է տալիս, որ եթե անձի մոտ ի սկզբանե ծագի միտքը ուրիշի գույքին խարդախությամբ տիրանալու արդեն խարդախություն է մինչեւ գույքը ստանալը, իսկ եթե մինչեւ գույք ստանալը չի կատարել որեւէ պարտավորություն , դա չպետք է դիտարկել որպես խարդախություն, քանի որ այստեղ քաղաքացիաիրավական բոլոր հարաբերությունները կդադարեն եւ որեւէ բիզնես գործարք կարող է դիտվել խարդախություն։
Ինչպես կարող էր Աշոտ Սուքիասյանն ի սկզբանե դիտավորություն ունենալ, եթե ժողովի գնալիս այն ժամանակ ներկայացել է Էկոնոմիկայի նախարարությունից»։