ԱՄՆ-ի նախագահ Դոնալդ Թրամփը մտադիր է հաստատել հակատանկային հրթիռների վաճառքը Ուկրաինային, հայտնում է DW-ն` վկայակոչելով ABC-ն:
Ինչպես նշում է ABC-ն դեկտեմբերի 23-ին, դա կդառնա Կիեւին մահաբեր զենքի մատակարարման որակական բաղադրիչի լուրջ ուժեղացում, որը կարող է օգտագործվել Ուկրաինայի արեւելքում ընթացող ռազմական գործողություններում: Եթե Թրամփը ստորագրի փաստաթուղթը, այն կներկայացվի ԱՄՆ Կոնգրեսին, որտեղ կքննարկվի մեկ ամսվա ընթացքում: Համաձայնագրի կատարման պարտավորությունները, եթե այն անցնի բոլոր ատյանները, կմնա Պետդեպարտամենտի վրա:
Ավելի ուշ Պետդեպարտամենտի մամուլի ծառայությունը հաստատել էր, որ Միացյալ Նահանգները Ուկրաինային «զարգացած պաշտպանական միջոցներ» են մատակարարելու:
«ԱՄՆ աջակցությունը միտված է բացառապես պաշտպանական բնույթ կրել, եւ, ինչպես մենք արդեն ընդգծել ենք, Ուկրաինան ինքնիշխան երկիր է, որը ինքն իրեն պաշտպանելու իրավունք ունի»,- նշվում է Պետդեպարտամենտի հայտարարության մեջ:
Գործարքի արժեքը մոտ 47 միլիոն դոլար է: Ենթադրվում է, որ Ուկրաինան կստանա 210 հակատանկային հրթիռ եւ 35 արձակման սարք:
