Հոկտեմբերին Ֆրանսիայի նախագահ Էմանուլ Մակրոնը պետական այցով կժամանի Հայաստան: Այս մասին այսօր՝ հունվարի 23-ին ասաց Ֆրանսիայի նախագահ Էմանուել Մակրոնը՝ Հայաստանի նախագահի հետ հանդիպումն ամփոփելով ԶԼՄ-ների առջեւ հայտարարությունով, հաղորդում է NEWS.am-ի թղթակիցը Փարիզից:
Երկու երկրների նախագահների հանդիպումը Մակրոնը գնահատեց որպես հետաքրքիր հանդիպում՝ նշելով, որ Ֆրանսիան մշտապես կլինի Հայաստանի կողքին:
«Հայաստանը երկար ճանապարհ է անցել՝ կառուցելով կայուն ժողովրդավարական երկիր արեւմուտքի եւ արեւելքի միջեւ: Այս բարդ տարածաշրջանում Ֆրանսիան ձեր կողքին կլինի եւ կօժանդակի, որ առաջ գնաք»,- ասաց Մակրոնը:
Ֆրանսիայի նախագահի խոսքով, 2018թվականը շատ կարեւոր է Հայաստանի համար: Մայիսի 28-ին Հայաստանի առաջին հանրապետության 100-ամյակին Ֆրանսիայից կմասնակցի արտաքին գործերի նախարարը, իսկ արդեն հոկտեմբերին կայանալիք Ֆրանկոֆոնիայի միջազգային կազմակերպության 17-րդ գագաթաժողովին կմասնակցի Էմանուլ Մակրոնը պետական այցի շրջանակում:
«Մեր հանդիպման ժամանակ որոշեցինք լայնացնել ֆրանսերենի դերը կրթության մեջ, ընդլայնել Ֆրանսիական համալսարանը, ստեղծել մշակութային կենտրոն»,- ասաց նա:
Նշենք, որ ՀՀ նախագահ Սերժ Սարգսյանը եռօրյա աշխատանքային այցով հունվարի 22-ից գտնվում է Ֆրանսիայում:
LIVE | Conférence de presse conjointe du Président de la République, @EmmanuelMacron et du Président de la République d'Arménie, Serge Sarkissian. https://t.co/rlQcL2CNsW
— Élysée (@Elysee) January 23, 2018