Ֆինլանդիայի ոստիկանությունը Կատալոնիայի ժեներալիտետի նախկին ղեկավար Կառլես Պուչդեմոնի կալանավորման եվրոպական կարգադրագիր է ստացել (EAW), սակայն այժմ չգիտի նրա գտնվելու վայրը, հաղորդում է «ՌԻԱ Նովոստին»:
«Ֆինլանդիան ստացել է Ֆինլանդիայում գտնվող Իսպանիայի քաղաքացու կալանքի մասին կարգադրագիր (EAW): Իսպանիան պահանջվող տեղեկատվությունը տրամադրել է Հետաքննությունների կենտրոնական բյուրոյին (Ֆինլանդիա) շաբաթ ցերեկը կալանքի միջազգային կարգադրագրի համար:
Բացի այդ, Կատալոնիայի խորհրդարանի խոսնակ, «Ձախ հանրապետականներ» անջատողական կուսակցության ներկայացուցիչ Ռոջեր Տորենը կոչ է արել ստեղծել «միասնական ճակատ` ժողովրդավարության պաշտպանության համար» եւ խոստացել է հասնել անկախության անօրինական հանրաքվեի կապակցությամբ ձերբակալված կատալոնական քաղաքական գործիչների ազատ արձակմանը:
Նիստից հետո Տորենը հանդես է եկել հայտարարությամբ: Նա դատավճիռներն անվանել է անարդար, որոնք խախտում են քաղաքական իրավունքները եւ քաղաքացիների իրավունքները:
«Նրանք չեղյալ համարեցին ոչ թե խորհրդարանի նիստը, այլ չեղյալ են համարել ժողովրդավարությունը ... Ես կոչ եմ անում ձեզ ստեղծել միասնական ճակատ՝ ժողովրդավարության, ազատության եւ բազմակարծության պաշտպանության համար », - ասել է նա:
Խոսնակը նաեւ ավելացրել է, որ նա ցանկանում է, որպեսզի ձերբակալված քաղաքական գործիչները «վերադառնան տուն»: «Մենք ուզում ենք, որ դուք տանը լինեք, եւ մենք դրան կհասնենք, մի կասկածեք», - ասել է Տորենը:
