Արմավիրի եւ Արագածոտնի մարզերում կարկուտ է տեղացել՝ վնասելով 4 համայնքների պտղատու այգիները: Արմավիրի Արգինա համայնքի բնակիչներից Էդվարդ Ստեփանյանը պատմեց, որ հիմնականում վնասվել են ծաղկած ծիրանենիները: Կարկուտը տեղացել է 15-20 րոպե, բայց, Ստեփանյանի խոսքով, դրանից առաջ կամ այդ ընթացքում կարկտակայաններից ոչ մի կրակոց չի արձակվել: Բերքի ավելի քան 20 տոկոսը վնասվել է, հիմա համայնքում մտահոգված են ցրտահարության խնդրով. եթե գիշերը ցուրտ լինի, մնացած բերքն էլ կվնասվի: Արագածոտնում էլ կարկուտը վնաս է հասցրել Արդենի, Արագածավան ե Գետափ գյուղերի այգիներին: Հիմա մարզային ղեկավարությունը հաշվարկում է վնասի չափը:

Արդեն մոտ ապագայում կիրառության մեջ կդրվեն հայկական արտադրության առաջին, այսպես կոչված, «կամիկաձե» անօդաչու թռչող սարքերը: Սարքի նախագծման աշխատանքներն ավարտվել էին դեռ 7 տարի առաջ, բայց այդ ժամանակ Զինված ուժերին այն հետաքրքիր չէր: Թերեւս, միայն ապրիլյան պատերազմից հետո հասկացան՝ ինչ կարեւոր տեխնիկա է: Քառօրյայից մեկ ամիս անց այն առաջին փորձարկումն անցավ: «Կամիկաձեն» ստեղծած KBX ընկերության ներկայացուցիչ Արմեն Վարդանյանն ասում է՝ այն ամբողջությամբ նախագծվել եւ արտադրվել է Հայաստանում: Երեւանում ընթացող «ԱրմՀայԹեք 2018» ցուցահանդեսին ընկերությունը մի քանի այլ անօդաչու սարքերի մոդելներ էլ է ներկայացրել: Դրանցից մեկը նախատեսված է 300 կմ/ժ արագությամբ 300 կմ հեռավորություն թռչելու համար, օգտակար բեռը 30 կգ է: Ստեղծվել են նաեւ հետախուզական սարքեր: Ընկերությունում կարծում են, որ Զինված ուժերի հետ համագործակցությունը կօգնի նաեւ արտասահմանյան շուկա դուրս գալ:

Սպառազինությունների եւ պաշտպանական տեխնոլոգիաների միջազգային ցուցահանդեսին հայկական կողմը հպարտությամբ ներկայացնում է նաեւ ինքնակառավարվող տանկը կամ, այսպես կոչված, կամիկաձե ռոբոտը: Դավիթ Նիկողոսյանի խոսքով՝ այն շուրջ 200 կգ ծանրություն ունի, կարող է տանել մինչեւ 300 կիլոգրամ քաշով բեռ: Նշենք, որ «ԱրմՀայԹեք 2018» միջազգային երկրորդ ցուցահանդեսը կփակվի մարտի 31-ին:

Մոսկվան սկսել է զանգվածաբար արտաքսել եվրոպացի եւ ամերիկացի դիվանագետներին: Արտգործնախարար Սերգեյ Լավրովը հայտարարել է, որ, մասնավորապես, ԱՄՆ-ի դեմ պատասխան միջոցները ներառում են նույն թվով՝ 60 դիվանագետների արտաքսում: ԱԳՆ հրավիրված ամերիկյան դեսպան Ջոն Հանթսմանին նաեւ տեղեկացրել են Սանկտ Պետերբուրգում ԱՄՆ հյուպատոսությունը փակելու մասին: Հիշեցնենք, որ այսպես կոչված «Սկրիպալի գործի» շրջանակում ԱՄՆ-ն էլ արտաքսել էր 60 ռուս դիվանագետների ու փակել Սիեթլում Ռուսաստանի գլխավոր հյուպատոսությունը:

Վաշինգտոնն արձագանքել է այս որոշմանը՝ Մոսկվայի գործողությունները «ցավալի» եւ «անհիմն» որակելով եւ խոստանալով պատասխան քայլեր ձեռնարկել: Մոսկվան, միաժամանակ, Լոնդոնից, որի պատճառով սկսվել է այս ամբողջ իրարանցումը, պահանջել է կրճատել Ռուսաստանում իր դիվանագետների թիվը: Իսկ ռուս նախկին լրտես Սերգեյ Սկրիպակի դուստրը՝ Յուլիա Սկրիպալը, որը հոր հետ միասին թունավորվել էր անգլիական Սոլսբերիում, կազդուրվում է: Բժիշկները տեղեկացրել են, որ աղջիկն արդեն սկսել է ուտել եւ խմել:

Ֆրանսիայի նախկին նախագահին եւս մեկ մեղադրանք է առաջադրվել: Հիմա էլ Նիկոլա Սարկոզին դատարանի առջեւ կկանգնի կոռուպցիայի եւ շահադիտական նպատակներով իր դիրքն օգտագործելու մեղադրանքով: Ըստ մեղադրանքի՝ նա փորձել է անօրինական ճանապարհով դատավորից տեղեկություն ստանալ իր դեմ սկսված հետաքննության մասին: Նշենք, որ ֆրանսիական դատախազությունը նախկին նախագահին մեղադրում է նաեաւ 2007 թվականի նախընտրական քարոզչության ապօրինի ֆինանսավորման եւ պետական միջոցների յուրացման համար: Սարկոզին հերքում է բոլոր մեղադրանքները: Նա դատական վերահսկողության ներքո է:

Սյունիքի մարզի ընդհանուր իրավասության դատարանը 3 երեխաների մայր Հասմիկ Սարգսյանին 10 հազար դրամ գողանալու համար 6.5 տարվա ազատազրկման է դատապարտել: Այս տեղեկությունն արագորեն տարածվեց սոցցանցերում եւ բուռն քննարկման առիթ դարձավ: Մի քանի օր է՝ օգտատերերն իրենց զայրույթն են հայտնում դատավճռի վերաբերյալ եւ հիշեցնում Սյունիքի նախկին մարզպետ Սուրիկ Խաչատրյանի տան մոտ տեղի ունեցած արյունալի միջադեպը, երբ քրեական պատասխանատվության ենթարկվեց միայն Բուդաղյանների որդին: Վճռին այսօր արձագանքել է գլխավոր դատախազությունը: NEWS.am-ի հետ զրույցում դատախազությունից պարզաբանեցին, որ Հասմիկ Սարգսյանը նախկինում 2 անգամ դատապարտված է եղել բնակարան ապօրինի մուտք գործելու եւ գողություն կատարելու համար, 2 դեպքում էլ պատիժը պայմանականորեն չի կիրառվել: Փորձաշրջանում գտնվելիս էլ հենց 3-րդ անգամ 3 երեխաների մայրն ընկերուհու տնից 10 հազար դրամ է գողացել: Դատարանը սա դիտարկել է որպես ծանրացնող հանգամանք եւ կնոջը 6.5 տարվա ազատազրկման դատապարտել: Ի դեպ, բնակարան ապօրինի մուտք գործելու եղանակով կատարված գողությունը ծանր հանցագործություն է համարվում:

Հայաստանի տարածքում, չնայած առատ տեղումներին, բոլոր ավտոճանապարհներն անցանելի են: Փոխարենն առավոտից փակ էր Վերին Լարսը՝ ե՛ւ բեռնատար, ե՛ւ մարդատար մեքենաների  համար: Վրաստանի ՆԳՆ արտակարգ իրավիճակների գործակալությունից հայտնել են ձնահոսքի վտանգի մասին: Ռուսական կողմում 120 մեքենա կար կուտակված: Ավելի ուշ Ստեփանծմինդա-Լարս ավտոճանապարհը թեթեւ մարդատարների համար բացվել է:

Մարտի 30-ին դոլարը փոքր-ինչ էժանացել է, եվրոն՝ թանկացել: Դոլարի փոխարժեքն արդյունքում կազմել է 480 դրամ, եվրոյինը՝ 591, ռուբլունը՝ 8 դրամ 36 լումա, ֆունտինը՝ 674 դրամ:

Մարտի 31-ի գիշերը հանրապետության ամբողջ տարածքում, ցերեկը՝ Լոռիում, Տավուշում, Սյունիքում եւ Արցախում սպասվում է անձրեւ եւ ամպրոպ: Օդի ջերմաստիճանը 5-6 աստիճանով կնվազի: Երեւանում նույնպես գիշերը տեղումներ կլինեն, ցերեկը սպասվում է առանց տեղումների եղանակ: Մայրաքաղաքում գիշերը կդիտվի +7+9, ցերեկը՝ +18+20 աստիճան տաքություն: