Իրանական միջուկային ծրագրի վերաբերյալ Գործողությունների համատեղ համապարփակ ծրագրի պարտավորություններն ԱՄՆ-ն վաղուց չէր կատարում եւ կարելի է ասել՝ գործնականում դուրս էր եկել համաձայնագրից: NEWS.am-ի հետ նման կարծիք հայտնեց Իրանի խորհրդարանի հայազգի պատգամավոր Կարեն Խանլարյանը:
«Եվ այժմ Թրամփն արդեն պաշտոնապես է այդ մասին հայտարարում: Ըստ իս, սա շատ կոպիտ խախտում է եւ անհեռատես քաղաքականություն, որը վարում է ԱՄՆ-ն: Ամբողջ տարածաշրջանը կանգնած է անկանխատեսելի զարգացումների առջեւ: Կարծում եմ՝ տարբեր զարգացումներ կարող են առաջացնել, ցավոք, ոչ խաղաղ բնույթի: Տարածաշրջանը հղի է նոր զարգացումներով»,- նշեց հայազգի պատգամավորը:
Կարեն Խանլարյանը նկատեց, որ Իրանը բավականին հավասարակշռված քայլերով փորձում է տարածաշրջանը տանել դեպի խաղաղություն, մինչդեռ կան երկրներ, մասնավորապես Սաուդյան Արաբիան եւ Թուրքիան, որոնք Իրանի այս դերի նկատմամբ ունեն թշնամական վերաբերմունք: Պատգամավորը կարծում է, որ այս իրավիճակից կօգտվեն այդ երկրները, քանի որ Միացյալ Նահանգների այս քայլը կսանձարձակի նրանց:
Անդրադառնալով Միացյալ Նահանգների այն հայտարարությանը, թե Իրանը չի պահպանում պայմանավորվածությունն ու շարունակում է զարգացնել իր միջուկային ծրագիրը, Կարեն Խանլարյանը նշեց, որ դա չի համապատասխանում իրականությանը. «Ընդհանրապես, Իրանի միջուկային ծրագիրը խաղաղ օգտագործման համար է նախատեսված եւ այդպես էլ շարունակվում է»:
Հիշեցնենք, որ ԱՄՆ նախագահ Դոնալդ Թրամփը հայտարարել էր Իրանի միջուկային համաձայնագրից դուրս գալու եւ Իրանի դեմ պատժամիջոցները վերսկսելու մասին: Ի պատասխան, Իրանի նախագահ Հասան Ռոհանին նշել էր, որ Թեհրանը կշարունակի իրականացնել Ֆրանսիայի, Մեծ Բրիտանիայի, Գերմանիայի, Չինաստանի եւ Ռուսաստանի հետ համաձայնագիրը` առանց ԱՄՆ-ի մասնակցության:
