Արմավիրի մարզում բնակարանային գողությունների, հափշտակության, գողության փորձի աղմկահարույց գործով առանցքային վկա Ալվինա Լեւոնյանի հարցաքննությունն անորոշ ժամանակով հետաձգվել է:
Լեւոնյանը գործով ամբաստանյալներից Վոլոդյա Կիրակոսյանի կինն է եւ գողությունները կազմակերպելու մեջ մեղադրվող Վոլոդյա Աբրահամյանի մորաքրոջ դուստրը: Հիշեցնենք, որ Կիրակոսյանը միակն է 8 ամբաստանյալներից, որ խոստովանական ցուցմունք է տվել եւ ընդունել իրեն առաջադրված մեղադրանքը: Արմավիրի մարզի ընդհանուր իրավասության դատարանում մայիսի 16-ին, ի պատասխան նախագահող դատավոր Վահե Խալաթյանի հարցի, Վոլոդյա Կիրակոսյանը հայտնեց, որ կինն օրեր առաջ երեխա է ունեցել եւ առայժմ չի կարող ասել, թե երբ կկարողանա գալ դատարան հարցաքննությունը շարունակելու:
Դատարանը որոշեց անցնել մյուս վկաների հարցաքննությունը, մինչեւ Ալվինա Լեւոնյանի կազդուրվելը: Այսօրվա նիստին հարցաքննվեց վկա Հովսեփ Սարոյանը: Նա Հայաստանի Հանրապետությունում եհովայի վկաների քրիստոնեական կրոնական կազմակերպության անդամ է: Հիշեցնենք, որ ըստ մեղադրանքի, ամբաստանյալներից Վռամ Շահինյանը հենց այս կազմակերպության հեռուստացույցն էր գողացել: Դատարանում Հովսեփ Սարոյանը նշեց, որ ճանաչում է Վռամ Շահինյանին, վերջինս, ըստ վկայի, մի քանի անգամ մասնակցել է իրենց կազմակերպության ժողովներին:
«Մի օր նկատեցինք, որ հեռուստացույցը չկա, հետո եկավ ոստիկանությունն ու իմացանք, որ գողացել են հեռուստացույցը: Մեր կազմակերպության հերթական ժողովից հետո ենք իմացել, որ հեռուստացույցը չկա»,- ասաց Հովսեփ Սարոյանը:
Մեղադրող Արա Մնացականյանի հարցին, թե գիտի՞՝ երբ ու ով է գողացել հեռուստացույցը, վկան նշեց, որ տեղյակ չէ: Նշենք, որ ըստ գործում առկա նյութերի, հեռուստացույցը գողացել են 2017թ.-ի ապրիլի 29-ից մայիսի 3-ն ընկած ժամանակահատվածում: Հեռուստացույցի անհետանալը Սարոյանն ու մյուսները նկատել են մայիսի 3-ին: Վկայի հարցաքննությունն այսքանով ավարտվեց:
Նշենք, որ դատարանն այս նիստի համար դատակոչել էր 7 վկա, սակայն, նրանցից եւ ոչ մեկը չէր ներկայացել: Դատավոր Վահե Խալաթյանը որոշում կայացրեց բերման ենթարկել այդ վկաներին: Հետաքրքրական է, որ դատակոչված 7 վկաներից 5-ը ոստիկանության աշխատակիցներ են:
Հաջորդ դատական նիստը նշանակվեց մայիսի 21-ին: