Երեւանի ավագանու 3-րդ նստաշրջանի վերջին՝ այսօրվա նիստին քաղաքապետ Տարոն Մարգարյանը չէր մասնակցում: Փոխքաղաքապետ Կամո Արեյանն ասել է՝ Մարգարյանն առողջական խնդիրներ ունի: Իսկ նիստի թոփ թեման քաղաքապետի ունեցվածքն էր եւ «Երեւան» հիմնադրամը, որտեղ ԱԱԾ-ն չարաշահումներ է հայտնաբերել ու մեղադրանք առաջադրել տնօրենին: Իսկ հիմնադրամի հոգաբարձուների խորհրդի նախագահը Տարոն Մարգարյանն է: Նրա՝ նիստին չմասնակցելը «Երկիր ծիրանի» խմբակցությունը կապեց հենց այս չարաշահումների հետ:
Զարուհի Փոստանջյանի խոսքով՝ քաղաքապետը պետք է գործով որպես մեղադրյալ ներգրավվի: «Երեւան» հիմնադրամի վերաբերյալ մի հարց էլ խմբակցության ղեկավարը փորձեց ճշտել հոգաբարձուների խորհրդի անդամ Նաիրա Նահապետյանից: Ի՞նչ երաշխիք կա, որ մարտի 8-ի կապակցությամբ 450 նվեր-քարտ ձեռք բերելու համար նախատեսված 150 հազար դոլարը նպատակային է օգտագործվել: ՀՀԿ-ական Նաիրա Նահապետյանը հարցն անպատասխան թողեց:
Հատկանշական է, որ հիմնադրամին գույք նվիրաբերելու մասին նախագիծն ավագանու նիստի օրակարգից հանվել էր: Կամո Արեյանը սա պայմանավորեց հիմնադրամի շուրջ ստեղծված իրավիճակով. երբ հարցը պետք է մտցվեր օրակարգ, ԱԱԾ-ն բոլոր փաստաթղթերն առգրավել է, իսկ Աշոտ Ղազարյանին՝ բերման ենթարկել:
Շուրջ 2 ժամ տեւած նիստի ընթացքում «Ելք» եւ «Երկիր ծիրանի» խմբակցության անդամները մի քանի անգամ քաղաքապետի հրաժարականի հարց բարձրացրին: Անի Սամսոնյանը, թվարկելով մայրաքաղաքի տարբեր խնդիրներ, կոչով դիմեց քաղաքային իշխանություններին:
Տարոն Մարգարյանի հրաժարականի մասին պահանջին Հանրապետականները որեւէ կերպ չարձագանքեցին. Կամո Արեյանը միայն հորդորեց նախաքննական մարմնի գործառույթ չիրականացնել: Արդեն նիստից հետո լրագրողների հետ զրույցում Ենոք Ազարյանը, պատասխանելով հարցին՝ արդյո՞ք Տարոն Մարգարյանի հրաժարականի հանրային պահանջ տեսնում է, խոստովանեց: Ավագանու ՀՀԿ խմբակցության անդամ Երվանդ Երզնկյանն իր հերթին հրաժարվեց խոսել Տարոն Մարգարյանի ահռելի ունեցվածքի մասին: Ասաց՝ մինչեւ դատարանի օրինական որոշում չլինի, կարծիք չի հայտնի: Հարցին՝ իր կարծիքով ինչպե՞ս է կուտակվել այդ հարստությունը, կոմպոզիտորն իրեն օրինակ բերեց: Քաղաքապետի ունեցվածքի մասին լրագրողները խորհրդարանում հարց են ուղղել նաեւ Էդուարդ Շարմազանովին:
Վաչագան Ղազարյանին ձերբակալելուց հետո Ազգային անվտանգության ծառայությունը նրան բերման ենթարկելու մասին հետաքրքիր մանրամասներ եւ տեսանյութ հրապարակեց: Պաշտոնական տեղեկության համաձայն՝ ԱԱԾ կադրային ռեզերվում գտնվող գեներալ-մայոր Ղազարյանին կասկածում են ապօրինի հարստանալու եւ բարձրաստիճան պաշտոնատար անձանց էթիկայի հանձնաժողովին տրամադրվող հայտարարագրում կեղծ տվյալներ ներկայացնելու մեջ: Ուշագրավ է, որ բերման ենթարկելուց հետո անձնական խուզարկության ժամանակ նրա ձեռքի պայուսակում 120 հազար դոլար եւ 436 մլն դրամ է հայտնաբերվել: Նրան բանկ ուղեկցած «Լեքսուս»-ից էլ ԱԱԾ աշխատակիցները 50 հազար դոլար են գտել: ԱԱԾ-ն տեղեկություններ ունի, որ բերման չենթարկվելու դեպքում Վաչագան Ղազարյանը մեկ այլ բանկի իր եւ կնոջ հաշիվներից պետք է եւս 1.5 մլրդ դրամ կանխիկացներ: Ուշագրավ է նաեւ այն, որ Ղազարյանն ասել է՝ «մոռացել» է հայտարագրել բանկային հաշիվներում առկա գումարները:
Հանրապետականները դեռեւս չեն շտապում այս ձերբակալության հարցով գնահատական տալ: Էդուարդ Շարմազանովը հորդորում է սպասել նախաքննության ավարտին: ՀՀԿ խոսնակը խուսափեց նաեւ պատասխանել հարցին՝ արդյո՞ք սա քաղաքական հետապնդում է: Շարմազանովը բացառեց նաեւ, որ ԱԱԾ-ի ստուգումները Հայաստանի երրորդ նախագահ Սերժ Սարգսյանին հասնեն: Հիշեցնենք, որ ապօրինի զենք կրելու կասկածանքով երեկ բերման էր ենթարկվել Սերժ Սարգսյանի եղբայրը՝ Ալեքսանդր Սարգսյանը, իսկ ավելի ուշ ազատ արձակվել:
Կառավարությունում այսօր քննարկել են զինծառայողների եւ երիտասարդ ընտանիքների բնակարանային խնդիրների լուծման հնարավորությունները: Որպեսզի վերջինները կարողանան բնակարան ձեռք բերել, մտադիր են, մասնավորապես, նվազեցնել տոկոսադրույքներն ու կանխավճարների չափը: Բնակարանային խնդրին վարչապետն անդրադարձել էր նաեւ երեկ ուշ երեկոյան ֆեյսբուքյան ուղիղ եթերում քաղաքացիների հարցերին պատասխանելիս: Հարցերից մեկը հենց այդ խնդրին էր վերաբերում: Նիկոլ Փաշինյանն ասաց՝ Կենտրոնական բանկի նախագահի հետ արդեն քննարկում է ունեցել: Վարչապետը կարեւորում է հատկապես մարզերում բնակարանաշինության զարգացումը:
Հարցերից մեկին ի պատասխան՝ Փաշինյանն անդրադարձավ նաեւ սահմանային իրավիճակին. վստահեցրեց, որ հարաբերական հանդարտության առումով իրադրությունն աննախադեպ է: Վարչապետը խոստովանեց, որ առաջնագծում հակառակորդի ուժերի կուտակումներ կան, Նախիջեւանի ուղղությամբ էլ՝ որոշակի լարվածություն, բայց անավարտ պատերազմի պայմաններում սա նորմալ գնահատեց:
Ստեփանակերտը պատասխանել է Արցախի տարածքում ռազմական եւ ռազմավարական օբյեկտները ոչնչացնելու մասին Իլհամ Ալիեւի հայտարարությանը: Ակնկալելով միջազգային հանրության կոշտ արձագանքը՝ Արցախի նախագահի խոսնակն այն արկածախնդրություն է որակել: Դավիթ Բաբայանը, միաժամանակ, վստահեցրել է, որ հայկական կողմը տեխնիկական առումով ի վիճակի է ոչ միայն ոչնչացնել Ադրբեջանի ռազմական եւ ռազմավարական օբյեկտները, այլ նույնիսկ Ալիեւի նստավայրը:
Իսկ Ալիեւը հերթական ռազմատենչ հայտարարարությունը հնչեցրել է Բաքվում այսօր անցկացված զինվորական շքերթի ժամանակ: Զորահանդեսին շուրջ 4000 մարդ է մասնակցել, այդ թվում՝ Թուրքիայի Զինված ուժերից: Ադրբեջանը հսկայական սպառազինություն է ցուցադրել՝ նորագույն զինտեխնիկա, անօդաչուներ, ուղղաթիռներ: Հիշեցնենք, որ վերջերս Բաքվի կողմից ձեռք բերված ամերիկյան արտադրության Bell-412 ուղղաթիռների հարցով հայկական կողմը դիմել է ԱՄՆ կոնգրեսականներին՝ փորձելով հասկանալ, թե ինչպես են դրանք Ադրբեջանի տրամադրության տակ հայտնվել:
Իսրայելը հերթական անգամ հրաժարվեց ճանաչել Հայոց ցեղասպանությունը: Կնեսեթի անդամ Թամար Զանդբերգը հետ է կանչել իր օրինագիծը: Պատգամավորը պարզաբանել է, որ պատճառն արտգործնախարարության պահանջն է՝ օրինագծում «ցեղասպանություն» եզրույթը փոխարինել «ողբերգություն» կամ «հայ ժողովրդի վերապրած սարսափները» ձեւակերպմամբ: Ավելի ուշ Զանդբերգը Facebook-ում գրել է, որ Իսրայելի «կառավարությունը միայն խոսքով է ուժեղ, իսկ իրականում, պարզվում է, նրան ճնշում են նեղ քաղաքական շահերը»: Նշենք, որ փորձագետները մշտապես կասկածի տակ են դնում Իսրայելի կողմից Հայոց ցեղասպանության ճանաչման հավանականությունը: Նման նախաձեռնությունները մշտապես արգելափակվում են, քանի որ կարող են ազդել Իսրայելի եւ Թուրքիայի միջեւ հարաբերությունների վրա: Սակայն ամեն անգամ, երբ երկու երկրների հարաբերություններում լարվածություն է առաջանում, հարցը նորից օրակարգում է հայտնվում:
Աննշան արժեւորումից հետո դոլարը, եվրոն եւ ռուբլին էժանացել են: Հունիսի 26-ին դոլարի փոխարժեքը կազմել է 482 դրամ, եվրոյինը՝ 561, ռուբլունը՝ 7 դրամ 66 լումա, ֆունտինը՝ 637 դրամ:
Հունիսի 27-30-ը հանրապետությունում սպասվում է առանց տեղումների եղանակ: Օդի ջերմաստիճանը 4-5 աստիճանով կբարձրանա: Երեւանում նույնպես վաղը տեղումներ չեն լինի: Մայրաքաղաքում գիշերը կդիտվի +21+23, ցերեկը՝ +36+38 աստիճան տաքություն: