Նիկոլ Փաշինյանն ի վերջո պաշտոնից ազատեց գլխավոր ռազմական տեսուչի տեղակալին: Հաղորդագրության համաձայն՝ գեներալ-մայոր Միքայել Արզումանյանն անձամբ է դիմում գրել: Նշենք, որ Արզումանյանի անունը կապվում էր Ստեփանակերտում Բակո Սահակյանի հրաժարականի պահանջով կազմակերպվող հանրահավաքների հետ: «Արցախյան զարթոնք» նախաձեռնող խումբը հայտարարել էր, որ Միքայել Արզումանյանը նույնպես սատարում է իրենց:
Եվ քանի որ լուրերը չէին հերքվել, վարչապետ Նիկոլ Փաշինյանն անհապաղ իր մոտ էր գեներալին եւ բացատրություն պահանջել: Փաշինյանը հայտարարել է, որ որեւէ զինվորական իրավունք չունի զբաղվել քաղաքականությամբ, հակառակ դեպքում խստագույնս կպատժվի: Պատմությունը, փաստորեն, ավարտվեց Արզումանյանի պաշտոնաթողությամբ: Նշենք, որ գերենալ-մայորն այս պաշտոնում աշխատեց մեկ ամսից էլ պակաս. նա գլխավոր ռազմական տեսուչի տեղակալ էր նշանակվել հունիսի 27-ին:
Ռուսական 102-րդ ռազմաբազայի ներկայացուցիչը ներողություն է խնդրել Շիրակի Փանիկ համայնքում տեղի ունեցած միջադեպի կապակցությամբ: Խոսքը հուլիսի 17-ին տեղի ունեցած միջադեպի մասին է. Փանիկ գյուղի բնակիչները կրակոցների ու պայթյունների ձայներ են լսել, որոշ ժամանակ անց պարզվել է, որ դրանց հեղինակը Գյումրիում տեղակայված ռուսական 102-րդ ռազմաբազայի ծառայողներն են: Նրանք առանց նախազգուշացնելու եւ առանց փաստաթղթերի գյուղ են մտել եւ զորավարժանք անցկացրել: Շիրակի մարզպետ Կարեն Սարուխանյանի հետ հանդիպմանը ռազմաբազայի ներկայացուցիչն ասել է՝ միջադեպն անփութության արդյունք է եղել, ներողություն է խնդրել եւ վստահեցրել, որ նման բացթողում այլեւս թույլ չեն տա: Բազայի հրամանատարությունը նաեւ ծառայողական քննություն է սկսելու:
Ռազմաբազայի հրամանատարին եւ Հայաստանում Ռուսաստանի դեսպանին էլ այսօր ընդունել է Դավիթ Տոնոյանը: Պաշտպանության նախարարը մանրամասն տեղեկություններ է պահանջել կատարվածի վերաբերյալ, նաեւ հորդորել այսուհետ ավելի սերտորեն համագործակցել նախարարության հետ եւ առավել մեծ ուշադրություն դարձնել քաղաքացիական բնակչության հետ աշխատանքին:
«Հյուսիս-Հարավ» ավտոճանապարհի ճակատագիրը հայտնի չէ. ֆինանսավորում չկա: Տրանսպորտի նախարար Աշոտ Հակոբյանն ասում է՝ 5 տրանշից բաղկացած ծրագրից միայն 3-ի մասով է ֆինանսավորումն ապահովված: Ֆինանսավորում դեռեւս չկա, մասնավորապես, ճանապարհի չորս հատվածների մասով՝ Արտաշատ-Սիսիան հատվածի 175 կմ-ի, Սիսիան-Քաջարան հատվածի շուրջ 60 կմ-ի, Գյումրիի շրջանցիկ հատվածի 23 կմ-ի եւ Գյումրի-Բավրա հատվածի 35 կմ-ի համար: Ընդհանուր առմամբ, Հյուսիս-Հարավ ճանապարհային միջանցքի ավելի քան 300 կմ հատվածի համար գումար դեռ չկա: Աշոտ Հակոբյանի խոսքով՝ այս պայմաններում եթե որեւէ մեկը ճանապարհի կառուցման վերջնաժամկետ կասի, անլուրջ:
Հայաստանն ամերիկյան ներդրումների մեծ հոսք, համենայն դեպս մոտ ապագայում, կարող է չակնկալել: Հայաստանում ԱՄՆ դեսպանն այսօր ասել է՝ գլխավոր խոչընդոտները կոռուպցիան եւ բոլոր տնտեսվարողների համար հավասար հնարավորությունները չապահովելն է: Ռիչարդ Միլսը ողջունում է կոռուպցիայի դեմ կառավարության սկսած պայքարը, բայց դեռ վաղ է համարում հայտարարել նոր խոշոր ներդրումների մասին: Դեսպանը վստահեցնում է, որ ամերիկացի գործարար շրջանակների կողմից հետաքրքրություն կա, բայց նրանք նաեւ հետեւում են, թե ինչպիսի ընթացք է տալիս կառավարությունը տեղական ու օտարերկրյա գործարարների խնդիրներին, ինչպես նաեւ «Լիդիան Արմենիայի» շուրջ ծավալվող իրադարձություններին:
Երեւանի հիվանդանոցներից մեկում 1 տարեկան երեխա է մահացել: Փոքրիկն Արտաշատից է: Երկու ամիս առաջ երեխայի մոտ սուր աղիքային ինֆեկցիա է հայտնաբերվել. նա անհրաժեշտ բուժում է ստացել, սակայն մի քանի շաբաթ հետո ջերմությունը բարձրացել է: Երեխային հիվանդանոց են տեղափոխել անգիտակից վիճակում, որտեղ էլ մի քանի ժամ անց մահացել է: Լրատվամիջոցներում տեղեկություններ կան, որ փոքրիկի մահվան պատճառը պատվաստումն է. բժիշկները, սակայն, հերքում են՝ պարզաբանելով, որ անալիզների համաձայն՝ նրա մոտ հեմոլիտիկ ստաֆիլոկոկ է ախտորոշվել:
Հուլիսի 18-ին դոլարն ու եվրոն էժանացել են, եվրոպական արժույթը՝ շուրջ 5 դրամով: Դոլարի փոխարժեքը կազմել է 480 դրամ, եվրոյինը՝ 558, ռուբլունը՝ 7 դրամ 62 լումա, ֆունտինը՝ 626 դրամ:
Հուլիսի 19-ին հանրապետության հյուսիսային շրջաններում սպասվում է անձրեւ եւ ամպրոպ: Օդի ջերմաստիճանը 5-7 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +34+36 աստիճան տաքություն:
