ՀՀ քննչական կոմիտեն հրաժարվում է հայտնել Yerevan.Today–ի խմբագրությունում խուզարկության մանրամասները։
ՔԿ տարածած հաղորդագրությունում, մասնավորապես, ասված է. «ՀՀ քննչական կոմիտեի ՀԿԳ քննության գլխավոր վարչության վարույթում շարունակվում է ՀՀ ազգային անվտանգության ծառայության տնօրեն Արթուր Վանեցյանի եւ ՀՀ հատուկ քննչական ծառայության պետ Սասուն Խաչատրյանի միջեւ տեղի ունեցած հեռախոսազրույցի գաղտնիությունը խախտելու՝ այն ձայնագրելու եւ տարածելու դեպքի առթիվ հարուցված քրեական գործի նախաքննությունը։ Հաշվի առնելով հանրության հետաքրքրությունը՝ տեղեկացնում ենք, որ քննության շրջանակներում, օրենքով սահմանված կարգով, մի քանի հասցեներում կատարվում են խուզարկություններ։ Քրեական գործով այլ մանրամասներ հրապարակման ենթակա չեն»։
Ավելի վաղ հայտնել էինք, որ այսօր առավոտվանից Yerevan.Today կայքի խմբագրությունում եւ նրա գլխավոր խմբագրի տանը ՀՀ իրավապահ մարմինները խուզարկություններ են կատարում:
Լրատվամիջոցների փոխանցմամբ՝ իրավապահները գաղտնալսման սարքեր են փնտրում, ստուգում են համակարգիչները։ Խմբագրության աշխատակիցներին թույլ չեն տալիս մտնել խմբագրություն։