Նման դեպք չունենք, որ մաքսանենգ ճանապարհով թմրանյութը բերվի երկիր եւ մնա երկրում: Այս մասին, այսօր՝ հոկտեմբերի 31-ին, լրագրողների հետ հանդիպման ժամանակ նշեց ՊԵԿ մաքսանենգության դեմ պայքարի վարչության պետ Վարդան Վարդանյանը՝ ամփոփելով 2018 թվականի 10 ամիսների տվյալները:
«Ունենք դեպք, որ թմրանյութը մաքսանենգ ճանապարհով մտել է Հայաստան, եւ դուրս գալու ճանապարհին փորձը կանխվել է: Մեկ այլ դեպքում էլ, Իրանի քաղաքացին 13 կգ մետամֆետամին պարունակուղ 4 նկարներ մաքսանենգ ճանապարհով բերել էր Հայաստան եւ փորձում էր արտահանել Ավստրալիա «Կարգո»-ի միջոցով»,-ասաց Վարդանյանը:
Նա անդրադարձավ նաեւ վարչապետի պաշտոնակատար Նիկոլ Փաշինյանի՝ Սյունիքի մարզում արած հայտարարությանը, թե Իրանի հետ սահմանին նարկոթրաֆիքինգ գոյություն ունի. Վարդանյանի խոսքով վարչապետի հայտարարությունից հետո հենց հաջորդ օրը ստացվել է հանձնարարական, կազմվել է օպերատիվ խումբ, որը հիմա ուժեղացված ծառայություն է իրականացնում Մեղրիի մաքսային կետում:
«Այդ գործուղումը տվել է իր արդյունքը, ունենք նոր բացահայտում, որը դեռ մամուլում հրապարակված չէ: Երեկ երեկոյան Մեղրիի մաքսակետում ՀՀ քաղաքացու մարմնի միջից հանել ենք 52 գրամ ափիոն տեսակի թմրանյութ: Թմրամիջոցների առումով ամենաթիրաայինը Մեղրի մաքսային կետն է եւ պատահական չէ, որ վարչապետն էլ շեշտադրում արեց հենց այդ մաքսակետի հետ կապված»,-ասաց նա:
