7-րդ գումարման Ազգային Ժողովի պատմագամավորներն այսօր օպերայի թատրոնում հանդիսավոր արարողությամբ ստացան իրենց բաժին մանդատները։ Առաջին մանդատը հանձնեց ամենատարեց ընտրողը՝ 103-ամյա Բավական Փիլոյանը։ https://news.am/arm/videos/20594.html
Ի դեպ, նաև բացակա կար, Գագիկ Ծառուկյանը մանդատների հանձման արարողությանը չէր մասանկցում զբաղվածության պատճառով․ պարզաբանեց նրա մամուլի խոսնակը։
Կառավարության չնայած թեթեւ օրակարգին, մի դրվագ բավականին տպավորիչ էր, այնքան որ վարչապետի պաշտոնակատարի ճնշումը, ինչպես ինքն ասաց, բարձրացավ․ որդեգրման ընթացակարգերի քննարկման ժամանակ Արարատ Միրզոյանը օդում կախված լուրեր հայտնեց, թե արտասահմանից երեխաներ են որդեգրում օրգանները վաճառելու նպատակով։
Եվս մեկ մեղադրյալ Մարտի 1-ի գործով։ NEWS.am-ի տեղեկություններով՝ Պաշտպանության նախկին նախարար Սեյրան Օհանյանին մեղադրանք է առաջադրվել Սահմանադրական կարգը տապալելու հոդվածով։ Նախկին նախարարը ստորագրությամբ ազատ է արձակվել։ Այս տեղեկությունը Հատուկ քննչական ծառայությունից հրաժարվեցին մեկնաբանել, այնուամենայնիվ՝ նաեւ չհերքեցին։
Ռոբերտ Քոչարյանի խափանման միջոցի գործը քննող դատավորը ինքնաբացարկ է հայտնել: Նախկին նախագահի փաստաբանը դա գնահատեց որպես արդարադատությունից խուսափելու ձգտում, հիշեցրեց՝ բոլոր հիմնավորումներն ավելի վաղ հայտնի էին, եւ դատավորը կարող դեռ դեկտեմբերին ինքնաբացարկ հայտնել։ Արամ Օրբելյանը տեղեկացրեց նաեւ, որ Քոչարյանը դեռևս ցուցոմունք չի տվել, քանի որ նրան առաջադրված մեղադրանքն անհասկանալի է փաստաբանական խմբին: Ասաց՝ տեքստում կրավորական սեռով ձեւակերպումներ են, եւ պարզ չէ, թե կոնկրետ ինչ գործողություններ են վերագրվում Քոչարյանին: Պարզաբանման համար դիմել են ՀՔԾ։
Դոլարի փոխարժեքն այսօր կազմել է 485 դրամ, եվրոն թանկացել է մոտ 3 ու կես դրամով, փոխարժեքը 559 դրամ է, բրիտանական ֆունտը 619 դրամ է, ռուսական ռուբլին՝ 7 ու 24 դրամ:
Հունվարի 11-ին Հայաստանում սպասվում է առանց տեղումների եղանակ: Օդի ջերմաստիճանը զգալի փոփոխություններ չի կրի: Առաջիկա գիշերը մայրաքաղաքում սպասվում է -5-7, վաղը ցերեկը՝ +1+3:
