Հանոյում ԱՄՆ նախագահ Դոնալդ Թրամփի եւ ԿԺԴՀ պետխորհրդի նախագահ Կիմ Չեն Ընի հանդիպման արդյունքները Գերմանիային հիասթափեցրել են։ Երկրի ԱԳ նախարար Խայկո Մասը ափսոսանք է հայտնել, որ կոնկրետ պայմանավորվածություններ ձեռք չեն բերվել՝ հայտնում է DW-ն։
«Եթե հաջողվեր Հյուսիսային Կորեային համոզել դադարեցնել իր միջուկային ծրագիրը եւ որպես ջարդոն հանձնել միջուկային զենքը, աշխարհը բավական անվտանգ կլիներ»,- հինգշաբթի օրը հայտարարել է նա։ Իհարկե, նշել է նա, գագաթաժողովի արդյունքները հետագա վերլուծության կարիք ունեն։
Սակայն, ըստ նախարարի, ապառազմականացման հարցով որեւէ արդյունք չի գրանցվել եւ «սա, բոլորովին ակնհայտ է, վատ լուր է աշխարհի համար»։ Մասի կարծիքով, բանակցությունները պետք է շարունակվեն։
