Ամերիկացի հայտնի սենատորներ Մարկո Ռուբիոն եւ Բեն Կարդինը ուղերձ են հղել Ադրբեջանի նախագահ Իլհամ Ալիեւին` կոչ անելով դադարեցնել երկրում լրագրողների հետապնդումը: Այս մասին հայտնում է Turan-ը:
«Մենք խորապես մտահոգված ենք Ադրբեջանում մամուլի եւ ազատությունների լուրջ եւ շարունակական խախտումներով»,- նշվում է նամակում: Մասնավորապես, սենատորները խոսում են լրագրող Խադիջա Իսմայիլովայի գործի մասին, որը 2014-ին դատապարտվել էր կեղծ մեղադրանքներով եւ պայմանականորեն ազատ էր արձակվել 2016 թվականին:
Ռուբիոն եւ Կարդինը Սենատի միջազգային հարաբերությունների ենթահանձնաժողովի նախագահներն ու անդամներն են, ինչպես նաեւ` Եվրոպայում անվտանգության եւ համագործակցության հանձնաժողովի անդամները, որը հայտնի է նաեւ որպես Հելսինկյան հանձնաժողով: Երկու սենատորներն էլ 2015 թվականից զբաղվում են Իսմայիլովայի գործով:
«Մենք հույս ունենք, որ ձեր կառավարությունը կաշխատի ԶԼՄ-ների համար ազատ գոտի ստեղծելու ուղղությամբ` միջազգային պարտավորությունների համաձայն, որպես Եվրոպայի խորհրդի և ԵԱՀԿ անդամ,- գրում են սենատորները:- Մենք նաեւ կոչ ենք անում անհապաղ վերացնել բոլոր սահմանափակումները տիկին Իսմայլովայի նկատմամբ»: «Ցավոք, Ադրբեջանում դատական համակարգի անկախության եւ հիմնական ազատությունների նկատմամբ հարգանքի մասին մտահոգությունները վնասում են երկրի նկատմամբ միջազգային վստահությանը եւ Ադրբեջանում ներդրումների անվտանգությանը»,- ասվում է նամակում:
Սենատորները հիշեցնում են, որ ավելի քան հինգ տարի է անցել Խադիջա Իսմայիլովայի ձերբակալությունից եւ «Ազատություն» ռադիոկայանի Բաքվի բյուրոյի փակումից հետո, երբ շատ լրագրողների ստիպեցին լռել, իսկ գրեթե բոլոր անկախ լրատվամիջոցներն արգելափակվեցին: Ընդ որում, երկրում անկախ հեռուստատեսություն չկա: «Նույնիսկ ադրբեջանցի լրագրողները, ովքեր աշխատում են երկրից դուրս, ոտնձգությունների են ենթարկվում: Մենք կոչ ենք անում դադարեցնել այդպիսի քաղաքականությունը եւ թույլ տալ, որպեսզի անկախ ԶԼՄ-ները կրկին աշխատեն Ադրբեջանում», - ասվում է հաղորդագրության մեջ: