Կոնգրեսի Սենատի պաշտոնյաները սենատորներին կոչ են արել անվտանգության նկատառումներով հրաժարվել Zoom հավելվածի օգտագործումից տեսակոնֆերանսների եւ այլ աշխատանքային հանդիպումների ացկացման համար: Այս մասին հայտնում է Financial Times-ը` վկայակոչելով երեք աղբյուր:
Ըստ նրանց` նման կոչով հանդես է եկել խորհրդարանական կարգադրիչը, որի պարտականությունների մեջ է մտնում նաեւ կարգապահական հարցերի լուծում: Սենատում դրա անդամներին կոչ են արել այլընտրանք գտնելու այդ ծրագրին, սակայն հավելվածի օգտագործման համար պաշտոնական արգելք չի սահմանվել:
The Financial Times-ը նշում է, որ ավելի վաղ Google-ն արգելել էր իր աշխատակիցներին ներբեռնել Zoom ծրագիրը` աշխատանքային նպատակներով օգտագործման համար, փոխանցում է ՏԱՍՍ-ը: Միեւնույն ժամանակ, ըստ թերթի, Պենտագոնում շարունակում են օգտագործել Zoom-ը, իսկ ԱՄՆ-ի ներքին անվտանգության նախարարությունում կարծում են, որ Zoom Video Communications ընկերությունը տեղյակ է անվտանգության խնդիրներից եւ ակտիվորեն աշխատանքներ է տանում դրանց լուծման ուղղությամբ:
Ապրիլի 3-ին The Washington Post-ը հայտնել էր, որ ծառայության միջոցով արված մասնավոր տեսազանգերի մի քանի հազար ձայնագրություն հասանելի է համացանցում: Դրանց թվում են տարբեր ընկերությունների աշխատանքային կոնֆերանսները, տարրական դպրոցների հեռավար դասընթացները, ինչպես նաեւ ծառայության օգտատերերի անձնական զրույցները:
Zoom Video Communications ընկերությունը, որի գխամասային գրասենյակը գտնվում է Սան Խոսեում, հիմնադրվել է 2011 թվականին չինական ծագմամբ ամերիկացի գործարար Էրիկ Յուանի կողմից: Ձեռնարկատիրոջ ունեցվածքը, ըստ Forbes ամսագրի, ներկայումս 6.5 միլիարդ դոլար է գնահատվում:
