Ավելի լավ է՝ Էներգետիկ հարցերում Հայաստանը չապավինի Բաքվին: Այս մասին NEWS.am-ի թղթակցի հետ զրույցում ասաց ԵՏՄ ինստիտուտի տնօրեն, Եվրասիական փորձագիտական ակումբի համահիմնադիր, քաղաքագետ Վլադիմիր Լեպեխինը:
«Դրա համար կա Իրանը: Պետք է քննարկել Իրանի հետ փոխգործակցության հնարավորությունները»,-նշեց նա:
Փորձագետը խորհուրդ տվեց չապավինել ադրբեջանական կողմին, քանի որ ցանկացած պահի դա կարող է շանտաժի առարկա դառնալ:
Հիշեցնենք` «Գազպրոմ էքսպորտ» ՍՊԸ-ն մարտի 17-ին հաղորդագրություն էր տարածել` հայտնելով, որ ռուսական գազը ժամանակավորապես Հայաստան կհասնի Ադրբեջանի տարածքով: Ըստ այդ հաղորդագրության` «Հյուսիսային Կովկաս-Անդրկովկաս» գազատարի ռուսական հատվածում պլանային կանխարգելիչ աշխատանքների ավարտից հետո գազը կմատակարարվի նախկին երթուղով։
Ինչպես հայտնում է Սպուտնիկ Արմենիան՝ հղում անելով «Գազպրոմ Արմենիա» ՓԲԸ մամուլի ծառայությանը, ռուսական գազը երեկվանից Հայաստան է հասնում Ադրբեջանի տարածքով, այդ երթուղին կգործի մարտի 18-ից մինչեւ ապրիլի 15-ը:
