Տեխասի նահանգապետ, հանրապետական Գրեգ Էբոթը հրամանագիր է ստորագրել, որի համաձայն՝ ձեռնարկությունները եւ կազմակերպությունները նահանգի տարածքում իրավունք չունեն պահանջել պարտադիր պատվաստում կորոնավիրուսի դեմ իրենց աշխատակիցներից կամ հաճախորդներից, տեղեկացրել է նա Թվիթերում։
«Հրամանագիր եմ ստորագրում որեւէ կազմակերպության կողմից պարտադիր պատվաստումն արգելելու մասին»,- գրել է նա եւ ավելացրել, որ այդ հարցը նաեւ մտցվել է նահանգի օրենսդիր ժողովի հատուկ նստաշրջանի օրակարգ։
Հրամանագրի տեքստի համաձայն՝ «ոչ մի կազմակերպություն իրավունք չունի որեւէ մեկին պարտադրել պատվաստվել COVID-19-ի դեմ՝ լինի աշխատակից, թե սպառող, որը համաձայն չէ պատվաստմանը անձնական բնույթի ցանկացած պատճառով, կրոնական համոզմունքներից կամ բժշկական նկատառումներից ելնելով»։
Ավելի վաղ Տեխասի իշխանություններն արգելել էին նահանգի ընկերություններին եւ հաստատություններին պահանջել բնակիչներից ներկայացնել նոր կորոնավիրուսի դեմ պատվաստումը հաստատող փաստաթուղթ՝ որպես որեւէ ծառայություն մատուցելու պայման։
