Իշխանության աղբյուրը ժողովուրդն է եւ նա իր ճնշմամբ պետք է իրականացնի իշխանափոխություն: Այս մասին այսօր՝ սեպտեմբերի 19-ին, Կառավարության շենքի մոտ հայտարարեց «Մայր Հայաստան» դաշինքի ղեկավար, ԱԺ նախկին պատգամավոր Անդրանիկ Թևանյանը։
«Ես նաեւ առաջարկում եմ մեր այստեղի պրոցեսների զուգահեռ քաղաքական ուժերին նախաձեռնել Նիկոլ Փաշինյանի հեռացման գործընթաց՝ իմպիչմենտի միջոցով, որպեսզի մենք կարողանանք իշխանության փոփոխությունն իրականացնել, քաղաքական բոլոր ուժերը՝ խորհրդարանական, թե արտախորհրդարանական, պետք է իրենց ջանքերը ներդնեն համապատասխան հզորություն հավաքելու եւ այդ տեխնոլոգիան կիրառելու, որպեսզի Նիկոլ Փաշինյանին հեռացնենք եւ ձեւավորենք նոր ազգային կառավարություն»,-հայտարարեց նա:
Թեւանյանը կոչ արեց բոլորին պահպանել մաքսիմալ կարգապահություն, մաքսիմալ թիմային ոգի. «Մենք վերցնում ենք այդ պատասխանատվությունը, որ պայքարը հասցնենք հաջող ավարտին: Ուրեմն ոչ մի այլ սադրանքի, թելադրանքի չենթարկվել: Միասնական ջանքերով հասնելու ենք իշխանափոխության եւ ապահովելու ենք Հայաստանի ու Արցախի անվտանգությունը:
Մենք շարունակելու ենք մնալ Հանրապետության հրապարակում: Կոչ արեք հավաքվել, որ կարողանանք համատեղ ջանքերով իրականացնենք մեր գլխավոր խնդիրը, որը իշխանափոխությունն է»:
