Լուրերը եւ հրապարակումներն այն մասին, որ «Հարավկովկասյան երկաթուղի» ՓԲԸ-ն իբր «ՌՈւՍԱԼ Արմենալի» սարքավորումները դուրս տանելու հայտ է ստացել, չեն համապատասխանում իրականությանը։ Այս մասին NEWS.am-ի թղթակցի հետ զրույցում մարտի 27-ին հայտնել է «Հարավկովասյան երկաթուղի» ՓԲԸ մամուլի քարտուղար Ռուբեն Գրձելյանը։

Նա ավելացրել է, որ «ՌՈւՍԱԼ Արմենալ» ձեռնարկությունից ոչ ոք «ՀԿԵՈւ» չի եկել։ Գրձելյանը նշել է, որ ձեռնարկությունն ինչպես փոխադրել, այնպես էլ շարունակում է փոխադրել պատրաստի արտադրանքը։ «Այդ փոխադրումներն իրականացնում է «Հարավկովկասյան երկաթուղին»,- նշել է նա։

«ՌՈւՍԱԼ Արմենալ» ձեռնարկության ներկայացուցիչ Նաիրի Մարկարյանը NEWS.am-ի թղթակցի հետ զրույցում, իր հերթին, հայտնել է, որ չունի այն տեղեկությունը, որը տարածել են ԶԼՄ-ները։ «Չեմ կարող մեկնաբանել այդ տեղեկությունը։ Ես բամբասանքներով եւ այլ մարդկանց խոսակցությունները տարածելով չեմ զբաղվում»,- ընդգծել է նա։

Մի քանի օր առաջ որոշ ԶԼՄ-ներ գրել էին, որ «ՌՈւՍԱԼ Արմենալ» գործարանը առաջիկայում լուծարվելու է։ Նշվել էր, որ սարքավորումների մի մասը կտեղափոխվի Ռուսաստան, ինչի համար կպահանջվի մոտ 200 վագոն։ Հրապարակման մեջ նշվել էր, որ արդեն պայմանավորվածություն կա ձեռնարկության եւ «Հարավկովկասյան երկաթուղու» միջեւ Ռուսաստան 200 վագոն ապրանք ուղարկելու մասին։