Այսօր Տավուշում և երկրի այլ վայրերում օջախային դիմադրություններն ու խաղաղ ցույցերը ոչ մի վտանգ չեն ներկայացնում իշխանությունների համար, քանի որ նրանք (իշխանությունները) հիմնվում են ոչ թե ներքին, այլ արտաքին աջակցության վրա։ Այս մասին NEWS.am-ի թղթակցի հետ զրույցում ասել է ՀՀ Պետական եկամուտների կոմիտեի նախկին ղեկավար Դավիթ Անանյանը։
«Մեր երկու երդվյալ հարևանների աջակցությունը նրանց համար ավելի էական նշանակություն ունի։ Կա հարկադրանքի գործոն, որին որոշ ժամանակ առաջ իշխանությունները ենթարկվելու իրենց պատրաստակամությունն են հայտնել։
Եթե մինչև 44-օրյա պատերազմը իշխանությունները փորձում էին ցույց տալ, որ ապավինում են ներքին աջակցությանը, ապա այսօր այդ մոտեցումները կտրուկ փոխվել են։ Ներքին դիմադրությունն այս պահին նրանց համար արժեք չունի, նրանք դա դիտարկում են հնարավոր լայն շարժման վերածվելու պոտենցիալ սպառնալիք։
Ըստ նրա, իշխանություններին ոգևորում են կոլեկտիվ Արևմուտքի աջակցության խոսքերը, այսպես կոչված, սահմանազատման հարցում, ինչը իշխանությունների ձեռքերն ազատում է նաև քաղաքացիների նկատմամբ բիրտ ուժ կիրառելու համար։
Նա ողջունել է քաղաքացիների բողոքի ցույցերը, հատկապես Տավուշում, որոնք դեմ են իրենց տներից հնարավոր վտարմանը, ափսոսանք հայտնելով, որ օջախային դիմադրության ֆոնին ավելի լայն հասարակական շարժում չի ձևավորվում։
«Դրա համար ամբողջ ժողովուրդը պետք է հասկանա, որ սա տեղական խնդիր չէ, քանի որ իշխանությունները օգտվում են մասնատված պայքարից։ 2020 թվականի նոյեմբերից հետո ժողովուրդը պառակտված է, իսկ հասարակությունը պասիվ, քանի որ առաջնորդի կարիք է զգում։ Իշխանությունները սա խելամտորեն են օգտագործում։ Հենց տեսնում են հասարակության համախմբման սաղմը, սկսում են պառակտել»,- ասել է Անանյանը։
Նա անընդունելի է համարել սահմանի մի հատվածը սահմանազատված անվանելու փորձերը այն պայմաններում, երբ երդվյալ հարևանը գրավել է քո տարածքի մի մասը։ Ընդ որում, սահմանազատումն իրականացնում են այն տարածքում, որն առավել պաշտպանված է։
«Սա նշանակում է առաջնորդվել հակառակորդի թելադրած օրակարգով»,- ընդգծել է նախկին պաշտոնյան։
Նա հիշեցրել է Հայաստանի նախկին վարչապետ Հրանտ Բագրատյանի խոսքն այն մասին, որ Ադրբեջանը Տավուշում տարածք չունի, այդ հարցը Խորհրդային Հայաստանի իշխանությունները փակել են դեռևս 1970-ական թվականներին։
«Բայց այսօր սպասարկվում է ոչ թե ներքին, այլ արտաքին օրակարգը, ավելի ճիշտ՝ դրսից հրահանգներ են իրականացվում։ Եթե 2018-ին մենք հոգնել էինք իշխանությունից, ապա այսօր կանգնած ենք գոյաբանական սպառնալիքների առաջ»,- եզրափակել է Անանյանը։
