նախընտրելի դարձնել
Մարոկկոյից լոնդոնյան Գեթվիկ օդանավակայան ժամանած ինքնաթիռի շասսիի խորշում տղամարդու դի է հայտնաբերվել, հաղորդում է Daily Mail-ը։
Օդանավակայանի տվյալներով՝ միջադեպը տեղի է ունեցել երեքշաբթի՝ տեղական ժամանակով 11:45-ի սահմաններում, Air Arabia ավիաընկերության ինքնաթիռում, որը չվերթ էր իրականացնում Մարոկկոյի Տանժեր քաղաքից դեպի Լոնդոն։
Գեթվիկ օդանավակայանի ներկայացուցիչը հայտնել է, որ դիակի հայտնաբերումից հետո օդանավակայանի ծառայություններն աջակցություն են ցուցաբերել Սասեքս կոմսության ոստիկանությանը և հետաքննություն վարող դատական փորձագիտության բժշկին։
«Մարմին է հայտնաբերվել, և մեր թիմերն աջակցություն են ցուցաբերել Սասեքսի ոստիկանությանն ու դատական փորձագիտության բժշկին։ Մեր մտքերը նրանց հետ են, ում առնչվել է այս միջադեպը»,- հայտարարել է օդանավակայանի ներկայացուցիչը։
Սասեքսի ոստիկանությունը հաստատել է, որ իրենց կանչել են ժամանած ինքնաթիռի շասսիի բաժնում տղամարդու դի հայտնաբերելուց հետո, և որ իրականացվում է հետաքննություն՝ դատական փորձագիտության բժշկին համար հաշվետվություն պատրաստելու նպատակով։
Նշվում է, որ նմանատիպ դեպք Գեթվիկում արդեն տեղի էր ունեցել 2022 թվականին, երբ Գամբիայից ժամանած ինքնաթիռի շասսիի խորշում կրկին տղամարդու դի էր գտնվել։
Այն ժամանակ մահացածը, որը ենթադրաբար 20-30 տարեկան տղամարդ էր, մահացել էր գերսառեցումից՝ բարձրության վրա էքստրեմալ ցածր ջերմաստիճանի պայմաններում թռիչքի ժամանակ։
