Արաբական Միացյալ Էմիրությունները վաղ թե ուշ ստիպված կլինեն վերականգնել հարաբերությունները Իրանի հետ՝ Մերձավոր Արևելքում հակամարտության ավարտից հետո։ Այդ մասին հայտարարել է ԱՄԷ նախագահի դիվանագիտական հարցերով խորհրդական Անվար Գարգաշը։

«Իրանի հետ հարաբերությունները մնում են առանցքային հարց ոչ միայն ԱՄԷ-ի, այլև Պարսից ծոցի բոլոր երկրների համար։ Իրանը մնում է մեր հարևանը, և ինչ-որ պահի մենք ստիպված կլինենք գտնել միջոց՝ վերականգնելու այն, ինչ հնարավոր է վերականգնել։ Աշխարհագրությունը մեզ այլընտրանք չի թողնում»,- ասել է նա Աբու Դաբիում անցկացվող Hili Forum միջազգային համաժողովում ունեցած ելույթի ժամանակ, որը նվիրված էր Մերձավոր Արևելքի աշխարհաքաղաքականության, տնտեսության և անվտանգության հարցերին։

Միևնույն ժամանակ Գարգաշը ընդգծել է, որ երկրների միջև վստահության վերականգնումը «այլ հարց է», քանի որ «գործառական հարաբերությունները» կարգավորելը շատ ավելի հեշտ է։ Նրա խոսքով՝ վստահության վերականգնման համար կարող են պահանջվել «շատ տարիներ, հնարավոր է՝ նույնիսկ տասնամյակներ»։

ԱՄՆ-ն և Իսրայելը պատերազմ են սկսել Իրանի դեմ փետրվարի 28-ին։ Հունիսին Վաշինգտոնն ու Թեհրանը ստորագրել են փոխըմբռնման հուշագիր, որը նախատեսում է ռազմական գործողությունների անհապաղ դադարեցում բոլոր ճակատներում, այդ թվում՝ Լիբանանում։ Սակայն հուլիսի 8-ի գիշերը ԱՄՆ-ն վերսկսել է Իրանի դեմ լայնածավալ հարվածները՝ նրան մեղադրելով ձեռք բերված պայմանավորվածությունների պայմանների խախտման մեջ՝ Օրմուզի նեղուցին վերաբերող մասով։ Դրա միջոցով իրականացվում է նավթի համաշխարհային առևտրի ծավալների մոտ 25%-ի և հեղուկացված բնական գազի մոտ 20%-ի փոխադրումը։ Այնուհետև ԱՄՆ վարչակազմը փաստացի ազդանշան է տվել Իրանի դեմ լայնածավալ ռազմական ուժի կիրառումը դադարեցնելու և պատժամիջոցների միջոցով նրա տնտեսական խեղդման փորձերի անցնելու մասին։