Իրանի հետախուզության նախարարությունը հայտարարել է ահաբեկչական խմբավորումների հետ կապված երեք օպերատիվ բջիջների վնասազերծման մասին, հաղորդում է Mehr-ը։

Գերատեսչության տվյալներով, դրանց անդամները ծրագրել էին ուժային կառույցների ներկայացուցիչների սպանություններ և դիվերսիաներ տնտեսական ու ռազմական ենթակառուցվածքների դեմ։

Կիրակի հրապարակված հայտարարության մեջ Իրանի նախարարությունը հայտնել է Արևմտյան Ադրբեջան, Ալբորզ և Քերման նահանգներում մի քանի կանխարգելիչ գործողությունների իրականացման մասին։

Արևմտյան Ադրբեջան նահանգում, ըստ գերատեսչության, ուժայինները վնասազերծել են անջատողական խմբավորման մի մասնակցի, որը, ենթադրաբար, ծրագրում էր սպանել ուժային կառույցների ներկայացուցչի Փիրանշահր քաղաքում։ Նախարարությունից հայտնել են, որ կասկածյալը զոհվել է հետախուզության աշխատակիցների հետ փոխհրաձգության ժամանակ՝ նախքան հարձակումն իրագործելը։

Ալբորզ նահանգում ձերբակալվել է մի անձ, որը կապված է եղել միապետականների խմբավորման հետ։

Իրանական կողմի տվյալներով, նա հրահանգներ էր ստացել իսրայելական հետախուզության հետ կապված համակարգողից և ծրագրում էր դիվերսիաներ իրականացնել։ Նախարարությունից նաև հայտնել են, որ ձերբակալվածը փոխանցում էր տեղեկություններ այն մարդկանց մասին, որոնց խմբավորումը համարում էր թիրախներ, ինչպես նաև Իսլամական հեղափոխության պահապանների կորպուսի և «Բասիջ» ստորաբաժանումների որոշ ռազմական օբյեկտների կոորդինատները։

Քերման նահանգում Իրանի հետախուզությունը հայտնել է կազմակերպված բջջի անդամների բացահայտման և ձերբակալման մասին, որը գերատեսչությունը կապել է խմբավորումների հետ, որոնք, ըստ նրա, առնչություն ունեն ամերիկյան և իսրայելական հատուկ ծառայությունների հետ։ Նախարարության պնդմամբ, կասկածյալները ձերբակալվել են նախքան որևէ դիվերսիոն գործողություն կատարելը։

Իրանական գերատեսչությունը այս գործողությունները անվանել է շարունակվող կանխարգելիչ միջոցառումների մաս այն խմբավորումների դեմ, որոնք Թեհրանն առնչակից է համարում օտարերկրյա հետախուզական ծառայություններին։