Բելառուսը պատրաստ է նաև հետագայում Մինսկը տրամադրել որպես Ուկրաինայի շուրջ բանակցությունների հարթակ, հայտարարել է երկրի արտաքին գործերի նախարար Մաքսիմ Ռիժենկովը՝ ելույթ ունենալով Նյու Յորքում ՄԱԿ-ի Գլխավոր ասամբլեայի 81-րդ նստաշրջանում, հայտնում է «Интерфакс»-ը։

Բելառուսի ԱԳ նախարարը նշել է, որ Մինսկն արդեն ապացուցել է, որ կարող է «հուսալի պայմանավորվածությունների հարթակ» լինել և պատրաստ է աջակցել Ուկրաինայում խաղաղության հնարավորինս շուտ հաստատմանը։

Միաժամանակ Ռիժենկովը հայտարարել է, որ կայուն կարգավորումն անհնար է առանց, ինչպես ինքն է արտահայտվել, հակամարտության «արմատական պատճառների» վերացման։ Դրանց թվում նախարարը նշել է Ուկրաինայի՝ ՆԱՏՕ-ին անդամակցելու ծրագրերը և Մինսկի համաձայնագրերը չկատարելը։

Ռիժենկովը պնդել է, որ Մինսկի համաձայնագրերը եղել են «խաղաղության միակ լեգիտիմ ճանապարհը», սակայն հետագայում ենթարկվել են դիտավորյալ խափանման։ Նրա վարկածով, դրանց նպատակը ժամանակ շահելն էր՝ ուկրաինական բանակի լայնածավալ վերազինման համար։ Նախարարը նաև հայտարարել է, որ հետագայում դա, իբր, հաստատել են արևմտյան երկրների ներկայացուցիչները։

«Ուկրաինան զենքով անվերջ մատակարարելը միայն հանգեցնում է հենց Ուկրաինայի և նրա ժողովրդի կործանմանը», — ասել է Ռիժենկովը։

Բելառուսի նախարարը կոչ է արել հնարավորինս շուտ սկսել «իրական բանակցությունները», որոնք, ըստ նրա, պետք է հանգեցնեն կայուն խաղաղության։

Մինսկը նախկինում հարթակ է եղել Ռուսաստանի և Ուկրաինայի միջև բանակցությունների համար լայնածավալ հակամարտության սկսվելուց հետո առաջին ամիսներին, ինչպես նաև հյուրընկալել է բանակցությունները, որոնք ավարտվել են 2014 և 2015 թվականներին Մինսկի համաձայնագրերի ստորագրմամբ։