ԱՄՆ նախագահ Դոնալդ Թրամփի վարչակազմը կտրուկ քննադատել է Լիբանանում՝ Վաշինգտոնում երկրի դեսպան Նադա Համադե Մոավադի դեմ ներկայացված բողոքը, հաղորդում է CBS News-ը։

Պետքարտուղարությունում կարծում են, որ «Հըզբոլլահ»-ին առնչություն ունեցող ուժերը փորձում են տապալել Լիբանանի և Իսրայելի միջև դիվանագիտական հարաբերությունների կարգավորմանն ուղղված ամերիկյան ջանքերը։

Բողոքը ներկայացվել է Լիբանանի ռազմական արդարադատությանը, երբ տեղական լրատվամիջոցներում հրապարակվել էր, որ Մոավադը կապ է հաստատել ԱՄՆ-ում Իսրայելի դեսպան Եխիել Լայտերի հետ։ Պատճառը, ըստ հրապարակման, դիվանագետի որդու ծանր վիրավորումն էր անցած ամիս Հորդանան գետի Արևմտյան ափում ավտոմեքենայի կիրառմամբ իրականացված ահաբեկչական հարձակման հետևանքով։

Պետքարտուղարության ներկայացուցիչը CBS News-ին հայտնել է, որ «ամոթալի» է քննարկել դեսպանի դեմ բողոքը, որն իրականացնում է իր երկրի օրինական կառավարության քաղաքականությունը և մասնակցում է ԱՄՆ միջնորդությամբ ընթացող բանակցություններին։ Ամերիկյան գերատեսչությունում միաժամանակ լիբանանյան ռազմական արդարադատությանը կոչ են արել կենտրոնանալ «Հըզբոլլահ»-ի զինյալների հետապնդման, այլ ոչ թե դիվանագետների գործողությունների վրա։ Ամերիկյան կողմի կարծիքով՝ բողոքը կարող է կապված լինել 1955 թվականի օրենքի հետ, որն արգելում է Լիբանանի քաղաքացիների և Իսրայելի միջև շփումները։

Վաշինգտոնը փորձում է մերձեցնել երկու երկրներին, որոնք ձևականորեն շարունակում են մնալ պատերազմի վիճակում։ Ապրիլին նրանց դեսպանները Վաշինգտոնում ուղիղ բանակցություններ են անցկացրել ԱՄՆ պետքարտուղար Մարկո Ռուբիոյի մասնակցությամբ։ Հունիսին կողմերը շրջանակային համաձայնագիր են ստորագրել, որը նախատեսում է իսրայելական զորքերի աստիճանական դուրսբերում Լիբանանի հարավից, «Հըզբոլլահ» շարժման զինաթափում և այնտեղ լիբանանյան կառավարական ուժերի տեղակայում։ Սակայն պայմանավորվածությունների իրականացումը կանգ է առել տարաձայնությունների պատճառով, իսկ օգոստոսին Հռոմում անցկացված բանակցությունների վերջին պաշտոնական փուլն ավարտվել է առանց բեկման։

Առայժմ պարզ չէ՝ Մոավադի դեմ բողոքը կհանգեցնի՞ արդյոք պաշտոնական դատական վարույթի։ Լիբանանի և Իսրայելի միջև բանակցությունների հերթական փուլը սպասվում է հոկտեմբերին՝ Հռոմում։