Իտալիայի վարչապետ Ջորջա Մելոնին համերաշխություն է հայտնել իրավապահ մարմինների աշխատակիցներին Միլանում տեղի ունեցած զանգվածային անկարգություններից հետո, որտեղ շաբաթ օրը՝ հոկտեմբերի 17-ին, կյանքի թանկացման դեմ ակցիայի մասնակիցները բախումներ և ավերումներ են կազմակերպել, հայտնում է Adnkronos.

«Կրկին իրավապահ մարմինների տղամարդիկ և կանայք ստիպված եղան բախվել հանցագործների բռնությանը, որոնք, այդ թվում՝ կազմակերպված խմբերով գործելով, օգտագործում են ցույցերը՝ բախումներ հրահրելու և քաոս սերմանելու համար», — գրել է Մելոնին սոցիալական ցանցերում։ Նա շնորհակալություն է հայտնել ոստիկաններին այն բանի համար, որ նրանք պաշտպանել են բնակիչների, աշխատողների, գործարարների և բոլոր նրանց անվտանգությունը, ովքեր իրավունք ունեն առանց վախի ապրել իրենց քաղաքում։

Միլանի քաղաքապետ Ջուզեպպե Սալան, իր հերթին, հայտարարել է, որ ծայրաստիճան մտահոգված է տեղի ունեցածով և առաջիկա շաբաթներին նոր անկարգություններից է վախենում։

RTL 102.5 ռադիոկայանի եթերում ելույթ ունենալիս Սալան նաև դատապարտել է ջարդարարներին և լիակատար աջակցություն հայտնել ոստիկանությանը։ Միաժամանակ քաղաքապետը կարծում է, որ հնարավոր բախումների մասշտաբները կարող էին թերագնահատված լինել, իսկ իրավապահ ուժերը՝ անբավարար։

«Դուոմոյի հրապարակում շատ ցուցարարներ կային, իսկ ոստիկանների փոքրաթիվ խումբը գտնվում էր մի կողմում։ Ինձ մոտ այնպիսի տպավորություն ստեղծվեց, որ երեկ մի կողմում շատ էին, իսկ մյուսում՝ քիչ», — հայտարարել է նա։

Սալայի վկայությամբ, հրապարակի շրջանում գտնվել է մոտ 200 ոստիկան։

Քաղաքապետը շեշտել է, որ չի կարելի անկարգությունների մասնակիցներին խառնել բազմաթիվ ուսանողների հետ, որոնք խաղաղ կերպով դուրս էին եկել ցույցի և վնաս չէին պատճառել։

Նա նաև զգուշացրել է սոցիալական ցանցերում արված հրապարակումների վտանգի մասին, որոնցում փորձել էին պարզել բողոքի ակցիայի մասնակիցների ինքնությունը․ նման գրառումները կարող են հանգեցնել ինքնադատաստանի։

Նախնական տվյալներով, բախումներից հետո ձերբակալվել է մոտ 60 մարդ, նրանցից մոտ կեսն անչափահասներ են։ Առնվազն 25 մարդ վնասվածքներ է ստացել, այդ թվում՝ իրավապահ մարմինների մոտ տասը աշխատակիցներ։ Բերված տվյալների համաձայն, ծանր վիրավորումներ չեն եղել։ Պաշտոնական վերջնական տվյալները դեռ սպասվում են։

Միլանի փողոցներն արդեն մաքրել են աղբից, սակայն խանութների բազմաթիվ ցուցափեղկեր մնացել են կոտրված։ Տեղական ԶԼՄ-ների հաղորդմամբ, ջարդերի մասնակիցներն օգտագործել են փայտեր, աղբամաններ, վարձակալված հեծանիվներ և սալահատակներից պոկված քարեր։