Հավաքական անվտանգության պայմանագրի կազմակերպության թմրամիջոցների անօրինական շրջանառության դեմ պայքարի ղեկավար իրավասու մարմինների հերթական` տասներկուերորդ նիստին մասնակցելու նպատակով հոկտեմբերի 24-ին երկօրյա պաշտոնական այցով Ղրղըզստանի մայրաքաղաք Բիշքեկ էին մեկնել ՀՀ ոստիկանության պետի առաջին տեղակալ, ոստիկանության գեներալ-մայոր Հունան Պողոսյանը եւ ոստիկանության կազմակերպված հանցավորության դեմ պայքարի գլխավոր վարչության թմրամիջոցների անօրինական շրջանառության դեմ պայքարի վարչության օպերատիվ տեղեկատվության բաժանմունքի պետ, ոստիկանության փոխգնդապետ Արթուր Մինասյանը:

Ոստիկանության լրատվության վարչությունից հայտնում են, թե նիստի ընթացքում քննարկվել են Հավաքական անվտանգության պայմանագրի կազմակերպության 2012 թվականին ծավալած գործունեությունը, 2013 թվականի աշխատանքների հեռանկարները, Հավաքական անվտանգության պայմանագրի կազմակերպության աշխատանքային խմբերի ամփոփումները, «Կանալ-Արեւելք» տեղական օպերատիվ միջոցառման արդյունքները, «ԳՌՕՄ-2012»  օպերատիվ-տակտիկական ուսուցման արդյունքները, «Կանալ» օպերատիվ միջոցառման շրջանակներում հատուկ տեղական միջոցառումների անցկացումը, ինչպես եւ «Կանալ» միջոցառման շրջանակներում Աֆղանստանի իրավասու մարմինների հետ միջոցառումների անցկացումը:

Նիստի մասնակիցները պայմանավորվածություն են ձեռք բերել`

-շարունակել զարգացնել ՀԱՊԿ անդամ-պետությունների թմրամիջոցների ապօրինի շրջանառության դեմ պայքարի իրավասու մարմինների օպերատիվ ստորաբաժանումների միջեւ գործնական համագործակցությունը, ուղղված աֆղանական թմրամիջոցների արտադրման հակազդմանը, թմրամիջոցների մաքսանենգության դեպքերի հայտնաբերմանը,

-շարունակել անցկացնել «Կանալ» օպերատիվ կանխարգելիչ միջոցառումների անցկացումը,

-մշակել 2013-2017 թթ. ժամանակահատվածի համար ՀԱՊԿ անդամ-պետությունների հակաթմրամիջոցային ռազմավարության նախագիծ:

Նիստի ժամանակ հավանության է արժանացել ՀԱՊԿ անդամ-պետությունների Քարտուղարության կողմից ներկայացված առաջարկությունը` ԱՊՀ մասնակից-պետությունների տարածքում կազմակերպված հանցավորության եւ այլ տեսակների հանցագործությունների դեմ պայքարի կոորդինացիոն Բյուրոյի եւ ՀԱՊԿ անդամ-պետությունների թմրամիջոցների ապօրինի շրջանառության դեմ պայքարի իրավասու մարմինների ղեկավարների խորհրդի միջեւ փոխգործակցության Հուշագրի ստորագրումը:

Նիստի շրջանակներում ընդունվել են հետեւյալ որոշումները`

-աշխատանքային խմբերում կատարված նշանակումների,

-ՀԱՊԿ անդամ-պետությունների թմրամիջոցների ապօրինի շրջանառության դեմ պայքարի իրավասու մարմինների ղեկավարների խորհրդին կից ստեղծված կանխարգելման ոլորտում միջգերատեսչական համագործակցության աշխատանքային խմբի կանոնադրության հաստատման,

-աշխատանքային խմբերի 2013 թվականի հիմնական միջոցառումների պլանների հաստատման,

-Աֆղանստանի Իսլամական Հանրապետության թմրամիջոցների դեմ պայքարի նախարարության մասնակցությունը «Կանալ» օպերատիվ-կանխարգելիչ միջոցառմանը մշտական մասնակցելու հիմունքներով,

-ՀԱՊԿ անդամ-պետությունների շրջանակներում թմրամիջոցների ապօրինի շրջանառության դեմ պայքարի վիճակի վերաբերյալ ամփոփ վերլուծական տեղեկատվության պատրաստման վերաբերյալ:

Նիստի անցկացման վերաբերյալ Խորհրդի Նախագահի կողմից ստորագրվել է համապատասխան արձանագրություն: