Դեդ Հասանի սպանության հնարավոր պատվիրատուին որոնելիս վրացի լրագրող եւ մի քանի գրքերի հեղինակ Գիգա Լիպարտելիանին Վրաստանի վարչապետ Բիձինա Իվանիշվիլիի հետքի վրա է դուրս եկել:

Նա պարզել է, որ Իվանիշվիլիի «Ռոսիյսկի կրեդիտ» բանկը 1990-ականներին կապեր է ունեցել Ուսոյանի եւ այլ «օրենքով գողերի» հետ:, իսկ այսօր նրանք հակամարտում են: Այդ մասին նա պատմել է ուկրաինական TBI հեռուստաալիքի  հետ հարցազրույցում:

«Դեդ Հասանին սպանեցին այն ժամանակ, երբ Վրաստանի վարչապետ դարձավ Բիձինա Իվանիշվիլին, 2010թ. Ուսոյանին կրակեցին, բայց չսպանեցին, դա նախազգուշական կրակոց  էր: Այժմ գնդակն ուղիղ գլխին էր դիպել: Այդ ամենը Վրաստանի նոր իշխանությունների հետ է կապված, որոնք ռուսական «գողական» արտադրանք են:

Ես գիրք եմ գրել Իվանիշվիլիի պատվիրած սպանությունների մասին:  1990-ականներին նա անձամբ էր պատվիրել Օթար եւ Ամիրան Քվանթրիաշվիլիների սպանությունը: Դրա ապացույցը կա», – հայտարարել է Լիպարտելիանին, գրում է «Գռուզիա օնլայնը»:

Հիշեցնենք, որ քրեական հեղինակություն Դեդ Հասանը (Ասլան Ուսոյան)  սպանվել էր հունվարի 16-ին Մոսկվայում, դիպուկահարի կողմից:  Հարազատները ցանկանում էին նրան հայրենի Թբիլիսիում թաղել, սակայն, վարկածներից մեկով վրացական իշխանությունները մերժել էին ընդունել նրա մարմինը,  մյուս վարկածով էլ՝  հուղարկավորությանը մասնակցել ցանկացող եղբայրներին անվտանգության երաշխիքներ չէին տրամադրել: