նախընտրելի դարձնելNEWS.am-ը ներկայացնում է բրիտանական «The Independent»-ի մոսկովյան թղթակից Շոն Ուոկերի հոդվածը որոշակի կրճատումներով.
Ադրբեջանցի քաղաքական գործիչը դրամական պարգեւ է խոստացել նրան, ով կկտրի վիճահարույց գրողի ականջը. սա վերջին շրջադարձն է ատելության ենթադրյալ արշավում, որն իրականացվում է երկրի ավտորիտար կառավարության կողմից` հերթական անգամ ուշադրությունը ներքին խնդիրներից շեղելու համար:
Գրող Ակրամ Այլիսլին դժբախտության մեջ է հայտնվել իր «Քարե երազներ» գրքի պատճառով, որտեղ նա պատմում է ԽՍՀՄ-ի փլուզման շրջանում ադրբեջանցիների կողմից հայերի նկատմամբ բռնությունների մասին: Նրա դեմ արշավ է իրականացվում հեռուստատեսային ծրագրերի եւ պաշտոնական հայտարարությունների միջոցով:
«Գիրքը պետք է պատմեր հայերի եւ ադրբեջանցիների միջեւ հաշտեցման մասին: Երբ գրում էի, հասկացա, որ դա կարող է վիճաբանություն առաջացնել, սակայն ոչ մի րոպե չէի կարծում, որ կսկսվի պետական մակարդակով այդ հսկայածավալ արշավը»,- «The Independent»-ին ասել է գրողը:
«Human Rights Watch» -ի Եվրոպայի եւ Կենտրոնական Ասիայի հարցերով տնօրեն Հյու Ուիլյամսոնն ասում է. «Ադրբեջանական իշխանությունները պարտավոր են պաշտպանել Այլիսլիին: Դրա փոխարեն նրանք ջանքեր են գործադրում նրան վախեցնելու համար` նրան մեղադրելով թշնամական հռետորաբանության մեջ»:
Արշավն իրականացվում է երկրում անսովոր քաղաքացիական հուզումներից հետո, իսկ Ալիեւը պատրաստվում է առաջադրվել տարեվերջին կայանալիք նախագահական ընտրություններին: Թեեւ նախագահը դեռ պահպանում է ադրբեջանցիների մեծամասնության աջակցությունը, բայց վերլուծաբանների կարծիքով, Ալիեւի ավտորիտար մեթոդներից դժգոհությունը եւ կառավորող էլիտայի շրջանում տարածված կոռուպցին չեն նպաստում ռեժմի հեղինակությանը:
«Ադրբեջանում ինչ-որ բան որոշակիորեն փոխվում է: Առաջին անգամ հազարավոր մարդիկ դուրս են գալիս բողոքի ակցիայի: Սա կառավարության հին խաղն է` ազգային խաղաքարտերը շահարկելով` հասնել աջակցության»,-ասել է բլոգեր եւ ակտիվիստ Էմին Միլին:
