ՆախընտրելիՄեքսիկական ծոցում անշարժացած Carnival Triumph զբոսանավը փետրվարի 14-ին չեն կարողացել քարշակելով ԱՄՆ-ի ափ հասցնել` կտրված ճոպանի պատճառով:
Զբոսանավը փորձել են երեք ճոպաններով քարշակել Ալաբամայի Մոբիլ քաղաքի նավահանգիստ, սակայն դրանցից մեկը կտրվել է, ինչի հետեւանքով զբոսանավը ափ հասցնելու գործողությունը հետաձգել են, հայտնում է AFP-ն:
Հիշեցնենք, որ զբոսանավում իրավիճակն աղետալի է. չի բավականացնում ջուրը եւ սնունդը, չի գործում կոյուղին: Կիսաֆաբրիկատների եւ խմելու ջրի համար երկար ժամեր տեւած հերթերը վերածվել են կռիվների: Չաշխատող կոյուղու պատճառով զբոսաշրջիկներն իրենց կարիքները հոգում են ամենուր` լոգարաններում, հյուրասենյակներում եւ նույնիսկ միջանցքներում:
Lenta.ru-ն գրում է, որ ուղեւորները օգնության կոչերով սավաններ են կախել, հեռախոսներով հարազատներին հայտնում են սանիտարական վատ պայմանների եւ ծովային տենդի մասին:
Carnival Triumph զբոսանավում 3143 ուղեւոր եւ անձնակազմի 1086 անդամ կա։
Սպասվում է, որ զբոսանավի քարշակման գործողությունը կավարտվի փետրվարի 15-ի առավոտյան:
