Այսօր փետրվարի 20-ին, բոտուլիզմով թունավորման հերթական դեպքն է գրանցվել Վանաձորում: Ինչպես հայտնում է NEWS.am-ի Լոռիի թղթակիցը, ժամը Վանաձոր քաղաքի երեք բնակչուհիներ 54-ամյա Վարսենիկ, 60-ամյա Գրետա եւ 92-ամյա Արեւ Ուլիբեկյանները բոտուլիզմ ախտորոշմամբ ծայրահեղ ծանր վիճակում տեղափոխվել են Վանաձորի բժշկական կենտրոն:

NEWS.am-ի Լոռիի թղթակցի հետ զրույցում Վանաձորի բժշկական կենտրոնի   անեսթեզիոլոգ, ռեանիմատոր Ալվարդ Հայրապետյանը հայտնել է, որ նրանք հիվանդանոց են տեղափոխվել շտապօգնության մեքենայով՝ծայրահեղ ծանր վիճակում: <Ըստ տուժածների պատմածի, նրանք՝Գրետա եւ Վարսենիկ Ուլիբեկյանները  փետրվարի  18-ին այցելել են իրենց մոր՝ Արեւ Ուլիբեկյանի տուն եւ այնտեղ կերել են մոր կողմից տնային պայմաններում պահածոյացված կարմիր պղպեղը:

Օգտագործելու օրը նրանց վիճակը լավ է եղել, նրանց ինքնազգացողութունը վատացել է   երեկ, փորձել են տնային միջոցներով կարգավորել ինքնազգացողությունը, սակայն երբ այսօր արդեն վիճակները եղել է բավականին ծանր, ահազանգել են շտապօգնություն եւ անմիջապես տեղավորվել վերակենդանացման բաժանմունք: Ժամը 19:00-ի դրությամբ Վարսենիկ եւ Արեւ Ուլիբեկյանների վիճակը գնահատվում էր ծանր, իսկ Գետա Ուլիբեկյանինը՝ ծայրահեղ ծանր:

Վանաձորի բժշկական կենտրոնի   անեսթեզիոլոգ, ռեանիմատոր Ալվարդ Հայրապետյանը մեզ հետ զրույցում մեկ անգամ եւս ազգաբնակչությանը հորդորեց զերծ մնալ տնային պայմաններում պայմաններում պահածոացված սննդամթերքներից:

Լուսանկարը՝ Էդվարդ Արզումանյանի