նախընտրելի դարձնելՓետրվարի 21-ին Մոսկվայում կառուցվող Հայկական վանական համալիրի տարածքում կանգնեցված խաչքարի մոտ տեղի է ունեցել ծաղկեպսակների եւ ծաղիկների մատուցման արարողություն՝ նվիրված 1988-ի «Ղարաբաղյան շարժման» եւ Արցախի գոյամարտում զոհված ազատամարտիկների հիշատակին:
Արարողությանը մասնակցել են ԼՂՀ ԱԳ նախարար Կարեն Միրզոյանը, ՌԴ-ում ՀՀ դեսպան Օլեգ Եսայանը, Մոսկվայում ԼՂՀ ներկայացուցչության, ինչպես նաեւ հայ համայնքային կառույցների ներկայացուցիչներ ու մոսկովյան բուհերի հայ ուսանողներ:
Ներկաներին ուղղված խոսքով դիմել է ԼՂՀ ԱԳ նախարար Կարեն Միրզոյանը՝ նշելով, որ այս օրերին աշխարհի տարբեր երկրներում յուրաքանչյուր հայ հարգանքի տուրք է մատուցում այն անձանց հիշատակին, որոնց անձնվեր գործունեության շնորհիվ այսօր Լեռնային Ղարաբաղի անկախությունն անհերքելի իրողություն է:
ՌԴ-ում ՀՀ դեսպան Օլեգ Եսայանը, հիշատակելով 1988թ. փետրվարի 20-ի ԼՂԻՄ մարզխորհրդի որոշումը՝ դիմել Ադրբեջանի ԽՍՀ, Հայկական ԽՍՀ եւ ԽՍՀՄ Գերագույն խորհուրդներին՝ մարզը Ադրբեջանի կազմից դուրս բերելու եւ Հայաստանի կազմի մեջ ընդգրկելու մասին, ընդգծել է, որ դրան ի պատասխան ադրբեջանական իշխանությունները Սումգայիթում սանձահարեցին խաղաղ հայ բնակչության ջարդերը:
Արարողությունն ուղեկցվել է Նոր Նախիջեւանի եւ Ռուսաստանի հայոց թեմի հոգեւորականների աղոթքով:
