Երիտասարդ գիտնականների գիտական գործուղումների ֆինանսական աջակցության տրամադրման մրցույթի հունիս ամսվա արդյունքներով արտասահմանյան գործուղումների կմեկնի 10 երիտասարդ գիտնական։

Աջակցությունը հատկացվում է ՀՀ նախագահի հովանու ներքո իրականացվող «Աջակցություն երիտասարդ գիտնականներին» ծրագրի շրջանակներում եւ Հայաստանի երիտասարդական հիմնադրամի օժանդակությամբ։

Մասնավորապես, հուլիսի 1-5-ին Ասատուր Խուրշուդյանը Մադրիդում մասնակցում է Երկրաչափության, մեխանիկայի 7-րդ ամառային դպրոցին։

ՌԴ Սանկտ Պետերբուրգ քաղաքում  հուլիսի 1-ին մեկնարկել է Տղամարդու առողջություն 9-րդ կոնգրեսը, որին ներկա է նաեւ Հայաստանը ներկայացնող Սեւադա Հակոբյանը:

Նարեկ Ասատրյանը հուլիսի 2-9-ին Ուկրաինայի Դոնեցկ քաղաքում կմասնակցի Ամառային տնտեսագիտական միջազգային 17-րդ դպրոցին։ 

Հենրիկ Ներսիսյանը հուլիսի 14-23-ն Իսպանիայի Սանֆրանս-Էստասիոն քաղաքում կմասնակցի Աստղաֆիզիկայի միջազգային դպրոցին։ 

Հուլիսի 22-26-ը Ճապոնիայում կանցկացվի ՙԷդիսոն 18՚ ծրագիրը, որին մասնակցության իրավունք է ստացել Մկրտիչ Երանոսյանը։

Սարգիս Աղայանն օգոստոսի 7-11-ը Հայաստանը կներկայացնի Վիլնյուսում կայանալիք Մալարիայի եւ վայրի բնության մակաբույծների միջազգային կոնֆերանսին։ 

Օգոստոսի 12-15-ը Շվեդիայի Կուպսալա քաղաքում տեղի կունենա «SGA Biennial meeting 12» գիտաժողովը։ Այստեղ իր մասնակցությունը կունենա  Սամվել Հովակիմյանը։ 

Անի Ասատրյանը սեպտեմբերի 1-5-ը Հայաստանը կներկայացնի Իռլանդիայի Դուբլին քաղաքում կայանալիք Եվրոպական ռադիացիոն ուսումնասիրության 40-րդ գիտաժողովին։ 

Սեպտեմբերի 23-27-ն Ահարոն Վարդանյանը եւ Արփինե Առուշանյանը Գերմանիայի Մյունսթեր քաղաքում կմասնակցեն Արեւելագերմանական ընկերակցության 32-րդ միջազգային գիտաժողովին։