նախընտրելի դարձնել
ԼՂՀ ՊԲ N զորամասի հրամանատար, գնդապետ Արտակ Բուդաղյանի դեմ առաջադրված մեղադրանքն ակնհայտորեն անհիմն է: Այս մասին NEWS.am-ի թղթակցի հետ զրույցում ասաց Արտակ Բուդաղյանի փաստաբան Հայկ Ալումյանը՝ խիստ բացասական գնահատելով Արտակ Բուդաղյանի դեմ մեղադրանք առաջադրելու հանգամանքը:
«Ակնհայտ անհիմն մեղադրանք է: Մեջբերվում են այնպիսի գործողություններ, որոնք տեղի չեն ունեցել: Օրինակ, իբր սպառնացել է մյուս կողմի կյանքին: Տրամագծորեն իրականությանը հակասում է»,- նշել է նա: Հարցին, թե այս դեպքում որն է առաջադրված մեղադրանքի նպատակը, փաստաբանը պատասխանեց. «Կարծում եմ՝ մեղադրանք առաջադրելու հանգամանքը պայմանավորված է մյուս կողմին ամեն գնով աջակցելու ցանկությամբ»:
Հայկ Ալումյանը զերծ մնաց առաջիկա քայլերի մասին չակերտները բացելուց:
Ինչպես ավելի վաղ հայտնել էր NEWS.am-ը, Սյունիքի նախկին մարզպետ Սուրիկ Խաչատրյանի տան մոտ հրազենային վնասվածք ստացած, ԼՂՀ N զորամասի հրամանատար, գնդապետ Արտակ Բուդաղյանին հուլիսի 9-ին մեղադրանք է առաջադրվել: Հայաստանի գլխավոր դատախազի մամուլի քարտուղար Սոնա Տռուզյանի խոսքով, Բուդաղյանին մեղադրանք է առաջադրվել Քր.օր.-ի 137-րդ հոդվածի 1-ին մասի հատկանիշներով (Սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը, եթե այդ սպառնալիքն իրականացնելու իրական վտանգ է եղել): Արտակ Բուդաղյանի նկատմամբ որպես խափանման միջոց է ընտրվել չհեռանալու ստորագրությունը: Հիշեցնենք, որ հունիսի 2-ին՝ ժամը 00:10-ի սահմաններում, Սյունիքի մարզպետ Սուրեն Խաչատրյանի տան մոտ հնչել են կրակոցներ, որի հետեւանքով 1 մարդ մահացել էր, եւս 2 մարդ հրազենային վնասվածքներով տեղափոխվել են Գորիսի բժշկական կենտրոն: Մահացածը Գորիսի քաղաքապետի նախկին թեկնածու Ավո Բուդաղյանն է, իսկ վիրավորներից մեկը՝ նրա եղբայրը՝ Արտակ Բուդաղյանը, ով ԼՂՀ N զորամասի հրամանատար է, մյուս վիրավորը՝ Նիկոլայ Աբրահամյանն է, ով Սյունիքի մարզպետ Սուրեն Խաչատրյանի ազգականն է եւ թիկնապահը: Կրակոցները հնչել են «Բերետա» տեսակի ատրճանակից եւ որսորդական հրացանից: Փաստի առթիվ արդեն հարուցվել է քրեական գործ՝ ՀՀ քրօրի 104 հոդվածի 1-ին մասի (սպանություն) եւ 235 հոդվածի (ապօրինի զենք, զինամթերք կրելը, պահելը, օգտագործելը) հատկանիշներով: Վիրավորներին Գորիսի բժշկական կենտրոնից ոստիկանության քրեական հետախուզության գլխավոր վարչության արագ հակազդման բաժնի օպերների ուղեկցությամբ շտապ օգնության մեքենաներով տեղափոխել են Երեւան: Գորիսում հայտնի Սդղի լճում խնջույք է եղել, որին մասնակցել է նաեւ ԼՂՀ նախագահ Բակո Սահակյանը: Վեճ է ծագել, որը շարունակվել է Սյունիքի մարզպետի տան մոտ:
Դեպքի կապակցությամբ ձերբակալվել, ապա կալանավորվել էր Սյունիքի մարզպետի թիկանապահ Զարզանդ Նիկողոսյանը եւ Սուրեն Խաչատրյանի որդին` 19-ամյա Տիգրան Խաչատրյանը: Գործի քննությունն իրականացնում է զինվորական դատախազությունը: Նրանց շահերը կպաշտպանեն երեք փաստաբան՝ Փաստաբանների պալատի նախագահ Ռուբեն Սահակյանը, Կարմեն Սահակյանը, Մարտին Զիլֆուղարյանը:
Սուրեն Խաչատրյանը հայտնի դեպքից հետո հայտարարել էր, թե ժամանակավորապես վայր է դնում մարզպետի իր լիազորությունները` մինչեւ նախաքննության ավարտը, թեեւ օրենքով նման բան նախատեսված չէ: Հունիսի 6-ին Կառավարությունն ընդունեց Սուրեն Խաչատրյանի` աշխատանքից ազատման դիմումը:
