Մեքսիկայի իրավապահ մարմինները երկուշաբթի ձերբակալել են  ռազմածովային նավատորմի փոխծովակալ Կառլոս Միգել Սալասարի` նախօրեին կատարված սպանության երեք կասկածյալի, հայտնել է երկրի գլխավոր դատախազ Խեսուս Մուրիլիո Քարամը: 

Ըստ նրա`  կասկածյալներն արդեն խոստովանական ցուցմունք են տվել՝ հայտնելով, որ իրենք  Միչոական եւ Գուանահուատո նահանգներում գործող «Տամպլիերների օրդենի ասպետներ» թմրակարտելի անդամներ են:

Ըստ Քարամի` հանցագործները խոստովանել են, որ իրենց միջինը ամսական 7,5 հազար պեսո (600 դոլար) են վճարել, որպեսզի ճանապարհներին հարձակումներ գործեն եւ առեւանգեն մարդկանց այդ թմրակարտելի անունից, հաղորդում է «ՌԻԱ Նովոստին»:

Փոխծովակալի մեքենայի վրա հարձակվել էին Միչոական նահանգի մայրուղիներից մեկում: Սալասարը Պուերտո Վալյարտեի կայան էր վերադառնում ընտանիքի հետ հանգստից հետո: Նրա հետ մեքենայում եղել էին  կինը, օգնականը եւ վարորդը: 

Հանցագործները հետապնդել են փոխծովակալի մեքենան եւ փաստաթղթեր պահանջել: Մերժումից ստանալով կրակել են, Սալասարը մարմնով ծածկել է իր կնոջը: Սպանվել են փոխծովակալը եւ նրա օգնականը, իսկ կինն ու վարորդը վիրավոր են: