նախընտրելի դարձնել
Պակիստանում սկսվել են նախագահական ընտրությունները: Այս առավոտյան իսլամական երկրի դաշնային եւ նահանգային խորհրդարանների պատգամավորները ձեռնամուխ են եղել պետության ղեկավարի ընտրությանը: Սպասվում է, որ քվեարկության ելքը պարզ կլինի տեղական ժամանակով 15:00-ին:
Համաձայն հարավասիական երկրի Սահմանադրության՝ նախագահին ընտրում է ընտրողների կոլեգիան, որի կազմում ընդգրկված են խորհրդարանի երկու պալատների՝ Ազգային ժողովի եւ Սենատի պատգամավորներ, նաեւ՝ Պակիստանի բոլոր չորս նահանգներից օրենսդիր ժողովների ներկայացուցիչներ:
Անվիճելի ֆավորիտն է իշխող կուսակցության՝ Պակիստանի մահմեդական լիգայի թեկնածու, խոշոր գործարար եւ Սինդ նահանգի նախկին ղեկավար Մամնուն Հուսեյնը, հայտնում է ԻՏԱՌ-ՏԱՍՍ-ը:
Նրա գլխավոր մրցակիցը՝ ընդդիմադիր «Հանուն արդարության շարժման» ներկայացուցիչ Վաջիութդին Ահմեդը, բավական հետ է ստացած ձայների թվով:
Գլխավոր ընդդիմադիր Պակիստանի ժողովրդական կուսակցությունը որոշել էր բոյկոտել քվեարկությունը: Այդ պատճառով նրանց թեկնածու սենատոր Ռազա Ռաբանին հանել էր թեկնածությունը:
