ԴՏԷԿ էներգետիկական հոլդինգին պատկանող «ԴՏԷԿ Թրեյդինգ» ընկերությունը, որը գլխավորում է Ուկրաինայի ամենահարուստ մարդը՝ Ռինատ Ահմեդովը,  լեհական PGNiG-ի հետ պայմանավորվել է Ուկրաինա գազ մատակարարելու վերաբերյալ: Ուկրաինական ընկերության մամուլի պաշտոնական հաղորդագրության մեջ ասվում է, որ  գազի փորձնական մատակարարումները նախատեսված են հոկտեմբերի 28-31-ին:

Լեհաստանից օրական  առավելագույն ներկրումը կազմում է 3,5 միլիոն խմ գազ: Դա նշանակում է, որ մեկ ամսվա ընթացքում, եթե փորձնական մատակարարումները հաջող լինեն, «ԴՏԷԿ Թրեյդինգը» կարող է ստանալ շուրջ 100 միլիոն խմ: 

ԴՏԷԿ-ը էներգետիկական  ընկերությունը վառելիքով է ապահովում նաեւ Ռինատ Ահմեդովի ամբողջ խմբի ձեռնարկություններին: Դրանց գազի տարեկան  պահանջարկը կազմում է վեց միլիարդ խմ:

Lenta.ru-ն պարզաբանում է, որ  «Գազպրոմ»-ում Կիեւի պայմանավորվածությունները եվրոպական երկրների հետ առնվազն  «գորշ» են համարում, քանի որ խոսքը կարող է գնալ միայն «Գազպրոմի» գազի վերաարտահանման մասին,  որը հնարավոր է դարձել շնորհիվ այն  բանի, որ բազմաթիվ եվրոպական երկրներ վառելիքը Ռուսաստանից ստանում են ավելի ցածր գներով, քան Ուկրաինան: