նախընտրելի դարձնել
Ուկրաինան ՆԱՏՕ-ի անդամ դառնալու հնարավորություն ունի, եթե կատարի դրա համար անհրաժեշտ բոլոր պայմանները, Բրյուսելի մամուլի ասուլիսում հայտարարել է ՆԱՏՕ-ի գլխավոր քարտուղար Անդերս Ֆոգ Ռասմուսենը:
Մասնավորապես, ըստ նրա, դրա համար Ուկրաինան պետք է հրաժարվի արտադաշինքային կարգավիճակից:
«Մենք հարգում ենք Ուկրաինայի որոշումը: Յուրաքանչյուր երկիր իրավունք ունի ինքնուրույն որոշում կայացնել անվտանգության քաղաքականության բնագավառում: Ես չեմ պատրաստվում միջամտել երկրի ներքին քաղաքական քննարկումներին: Սակայն եթե Ուկրաինան կատարի ՆԱՏՕ-ի անդամակցության անհրաժեշտ պահանջները, այդ թվում նաեւ չեղյալ հայտարարի արտադաշինքային կարգավիճակի մասին կետը, նա դաշինքի անդամ դառնալու հնարավորություն ունի», — Ռասմուսենի խոսքերն է մեջբերում rbc-ukraina-ն:
Նա նշել է, որ Ուկրաինա-ՆԱՏՕ այսօրվա հանդիպմանն այդ հարցը չի քննարկվել:
Հիշեցնենք, որ օգոստոսի 28-ին՝ Ուկրաինայի ազգային անվտանգության եւ պաշտպանության խորհրդի արտակարգ նիստում, խորհրդի քարտուղարի տեղակալ Միխայիլ Կովալը հայտարարել է, որ Ուկրաինան ԱՄՆ-ին կխնդրի իրեն հատուկ դաշնակցի կարգավիճակ տալ՝ ՆԱՏՕ-ից դուրս:
Օգոստոսի 29-ին Ուկրաինայի վարչապետ Արսենի Յացենյուկն ասել է, որ Ուկրաինայի կառավարությունը Գերագույն ռադա օրինագիծ կներկայացնի, որը նախատեսում է դաշինքներից դուրս գտնվելու երկրի կարգավիճակի վերացում եւ նրա անդամակցությունը ՆԱՏՕ-ին:
