նախընտրելի դարձնելՀՀ ԱԺ նախագահ Հովիկ Աբրահամյանը այսօր` հունիսի 25-ին ընդունել է Քուվեյթի ֆինանսների նախարար Մուստաֆա Ջասեմ ալ-Շամալիի գլխավորած պատվիրակությանը:
Ինչպես NEWS.am-ը տեղեկանում է ԱԺ մամուլի ծառայությունից, Հ. Աբրահամյանը ողջունել է «Ներդրումների խրախուսման եւ փոխադարձ պաշտպանության» համաձայնագրի ստորագրումը, որը կխթանի քուվեյթյան կապիտալի մուտքը եւ բարենպաստ պայմաններ կստեղծի երկու երկրների գործարարների համար տնտեսության ոլորտներում ներդրումներ կատարելու առումով: Այս համատեքստում նա կարեւորել է բիզնես ֆորումների անցկացումը, գործարարների շփումները, համագործակցությունը միջազգային կառույցներում, ինչպես նաեւ պատվիրակությունների փոխայցերը:
Երկու երկրների խորհրդարաններում գործում են պատգամավորական բարեկամության խմբեր:
Պարոն Մուստաֆա Ջասեմ ալ-Շամալին նշել է, որ Քուվեյթը շահագրգիռ է Հայաստանի հետ զարգացնել առեւտրատնտեսական ու գիտամշակութային կապերը:
Հանդիպման ընթացքում կողմերը անդրադարձել են տարածաշրջանային խնդիրներին, հայ-թուրքական հարաբերությունների կարգավորման հնարավորություններին, ղարաբաղյան հիմնախնդրին` համոզմունք հայտնելով , որ 21-րդ դարում հակամարտությունների խաղաղ, բանակցային ճանապարհով կարգավորումը այլընտրանք չունի եւ ուժի կիրառումը ու ռազմատենչ հայտարարությունները չեն կարող նպաստել հիմնախնդիրների լուծմանը:
