նախընտրելի դարձնել
Պահեստազորի գնդապետ, խարդախության մեղադրանքով 6 տարի 6 ամիս ազատազրկման դատապարտված Վոլոդյա Ավետիսյանի փաստաբան Արա Զաքարյանը դիմել է Վճռաբեկ դատարան՝ բեկանելու առաջին ատյանի եւ Վերաքննիչ քրեական դատարանների կայացրած որոշումը: NEWS.am-ի հետ զրույցում Արա Զաքարյանը մտավախություն հայտնեց, որ Վճռաբեկ դատարանը գործը վարույթ չի ընդունի:
«Առանձնապես շատ ակնկալիքներ չունեմ Վճռաբեկ դատարանից, որովհետեւ մեր դատարաններն անկախ չեն իշխանություններից, հատկապես քաղաքական մոտիվներով եւ քաղաքական հնչեղություն ունեցող գործերի մասին է խոսքը: Այս պարագայում կարծում եմ, որ Վճռաբեկը կգերադասի վարույթ չընդունել»,- ասաց փաստաբանը:
Արա Զաքարյանը հայտնեց, որ իրենք մտադիր են դիմել Եվրոպական դատարան:
Հիշեցնենք, որ Վոլոդյա Ավետիսյանը մեղադրվում էր խարդախության համար։ Ըստ նրան առաջադրված մեղադրանքի՝ նա 2000 դոլար կաշառք է վերցրել Հենրիկ Զաքարյանից՝ նրա թոռանը ժամկետային ծառայությունից ազատելու համար, եւ 500 դոլար է պահանջել Ալբերտ Մաթոսյանից նրա որդուն զորամասում համակարգչային օպերատոր նշանակելու հարցը լուծելու համար։ Վոլոդյա Ավետիսյանը հերքում է մեղադրանքը։ Նա եւ իր մարտական ընկերները կարծում են, որ սա քաղաքական հետապնդում է պահեստազորի գնդապետի դեմ՝ իրենց սոցիալական պայմանները բարելավելու նպատակով ազատամարտիկների բողոքի շարժումը ղեկավարելու համար:
