նախընտրելի դարձնելՀունաստանի փոխվարչապետ եւ արտգործնախարար Էվանգելոս Վենիզելոսը Թուրքիայի արտգործնախարար Մեւլյուտ Չավուշօղլուի հետ հանդիպմանը կրկին բարձրացրել է Barbaros հետազոտական նավը Կիպրոսի բացառիկ տնտեսական գոտուց դուրս բերելու հարցը:
Հանդիպումը տեղի է ունեցել Սալոնիկում՝ Սեւ ծովի տնտեսական համագործակցության անդամ երկրների արտգործնախարաների խորհրդի 31-րդ նիստի շրջանակում:
Չավուշօղլուն Վենիզելոսին առաջարկել է միասին այցելել Կիպրոսի նախագահ Նիկոս Անաստասիադիսին, երբ վերջինս ԱՄՆ-ում վիրահատությունից հետո վերադառնա Կիպրոս: Իր հերթին Հունաստանի արտգործնախարարը դա «լավ գաղափար» է անվանել, հայտնել են Հունաստանի ԱԳՆ-ում:
Ըստ հաղորդագրության՝ նախարարները քննարկել են քայլերը, որոնք անհրաժեշտ են ձեռնարկել Կիպրոսի շուրջ լարվածոթյունը նվազեցնելու համար, եւ Վենիզելոսը կրկին բարձրացրել է Barbaros հետազոտական նավը Կիպրոսի բացառիկ տնտեսական գոտուց դուրս բերելու հարցը, փոխանցում է «ՌԻԱ Նովոստին»:
Թուրքիայի Barbaros հետազոտական նավը հոկտեմբերի 20-ից ապօրինի սեյսմիկ հետազոտություն է իրականացնում Կիպրոսի բացառիկ տնտեսական գոտում: Այդ հատվածը Կիպրոսի իշխանությունները հանձնել են ENI/KOGAS ընկերության շահագործմանը, սակայն Թուրքիան խանգարում է աշխատանքներն սկսելուն, եւ ուղարկել է իր հետազոտական նավը՝ ռազմանավերի ուղեկցությամբ: Դա դարձել է կիպրոսյան հարցի կարգավորման վերաբերյալ բանակցությունների խափանման պատճառ:
