նախընտրելի դարձնելԱդրբեջանի գլխավոր դատախազության աշխատակիցները խուզարկություն են իրականացրել «Ազատություն» ռադիոկայանի Բաքվի գրասենյակում:
Ըստ ռադիոկայանի՝ գլխավոր դատախազության առնվազն 10 աշխատակիցներ ոստիկանների ուղեկցությամբ ներխուժել են կազմակերպության գրասենյակ եւ հայտնել, որ իրենք գրասենյակը փակելու վերաբերյալ դատարանի որոշում ունեն:
Հաղորդվում է, որ անջատված են ներքին հեռախոսներն ու ինտերնետը: Խուզարկությանը մասնակցում են վկաներ, որոնց բերել են գլխավոր դատախազության աշխատակիցները:
Գրասենյակում գտնվող 20 աշխատակիցներին հավաքել են մեկ սենյակում եւ թույլ չեն տալիս մոտենալ համակարգիչներին կամ լքել շենքը: Գլխավոր դատախազության աշխատակիցները պահանջել են բացել չհրկիզվող պահարանը, որտեղ պահվում են կազմակերպության փաստաթղթերը:
Ըստ գերատեսչության՝ քննչական միջոցառումներն անց են կացվում գրասենյակի՝ որպես արտասահմանից ֆինանսավորվող ոչ առեւտրային կազմակերպության գործունեությունը հետաքննելու շրջանակում:
Նշվում է, որ Ադրբեջանի իրավապահները նման ստուգայցեր վերջին տարիներին անց են կացրել IREX-ի եւ Ժողովրդավարության ազգային ինստիտուտի գրասենյակներում: Երկու կազմակերպություններն էլ փակվել են:
