նախընտրելի դարձնելԱՄՆ-ի Օկլահոմա նահանգում Սենթինել քաղաքի բնակիչը որսորդական հրացանով չորս անգամ կրակել է սեւամորթ ոստիկանապետի վրա, որը շփոթել էր հասցեն եւ կոտրել այլ դուռ, սակայն «հրաձիգը», ամենայն հավանականությամբ, դատական պատասխանատվության չի ենթարկվի, հայտնում է «ՌԻԱ Նովոստին»:
Ոստիկանապետ Լուիս Ռոսը հինգշաբթի տեղի ժամանակով ժ. 06.00-ին ժամանել է Դալլաս Հորթոնի տուն՝ մտադրվելով ձերբակալել նրան կեղծ ռումբի մասին զանգի պատճառով, հայտնում է New York Daily News թերթը: Երբ ոստիկանը կոտրել է տան դուռը եւ ներկայացել, Հորթոնը երեք անգամ կրակել է նրա կրծքին, եւս մեկ անգամ էլ կրակել սպայի ձեռքին: Բարեբախտաբար, ոստիկանը զրահաբաճկոն է հագած եղել: Եվս մեկ փամփուշտ ծակել է հարեւանի լոգարանի պատը:
Հորթոնին եւ նրա կնոջը ձերբակալել են ու հարցաքննել, սակայն շուտով բաց են թողել: Օկլահոմա նահանգի հետախուզությունների բյուրոյի հաշվետվությունում հաղորդվում է, որ Հորթոնը չի սպասել, որ ոստիկանությունն առավոտյան իր տուն կգա, ավելին, ոստիկանները շփոթել են տունը:
Հորթոնի տանը իշխանությունները մի քանի հրացան են գտել, ինչպես նաեւ զոմբի-ապոկալիպսիսի մասին նախազգուշացնող պաստառներ:
Բժիշկները կարծում են, որ Ռոսը կազդուրվել է վնասվածքներից:
Հետախուզությունների բյուրոն պարզել է, որ ոստիկանություն է զանգել ոմն մեկը, որը ներկայացել է՝ որպես Դալլաս Հորթոն, սակայն զանգը չի արվել Հորթոնի տան հեռախոսից:
