Այս տարի Հայաստանում զանգվածային թունավորումների դեպքերի թիվը նախորդ տարվա համեմատ  ավելացել է: Այս մասին  այսօր՝ սեպտեմբերի 12-ին, լրագրողների հետ հանդիպմանն ասաց  «Սպառողների խորհրդատվական կենտրոն»  ՀԿ նախագահ՝ Կարեն Չիլինգարյանը:  Նրա խոսքով՝ վերջին ամիսներին մասսայական թունավորումները վկայում են , որ  սննդամթերքի անվտանգության հետ կապված  մեծ խնդիրներ կան Հայաստանում:

«Սննդի անվտանգության տեսչությունը կամ լուրջ չի մոտենում հարցին, կամ լծակ չունի հարցերը կարգավորելու  համար: Ըստ էության, նախատեսված է ամենօրյա ստուգումներ մանկապարտեզներում եւ դպրոցներում, բայց փաստացի դրանք չեն կատարվում»,-ասաց նա:

Կարեն Չիլինգարյանի խոսքով՝ թունավորումների  դեպքերը պետք է բացահայտվեն եւ մեղավորները պատժվեն:

«Եթե մի անգամ չբացահայտվեց, երկրորդ անգամ չբացահայտվեց, դա արդեն պարբերական բնույթ կարող է կրել: Պետք է պարզել, թե նույն մատակարարին ինչպես են ընտրում : Առաջ քիչ թե շատ աշխատանք կատարվում էր, մինչդեռ հիմա պարզ չի ստուգումներ արվում են, թե չէ»,- ասաց նա: