Շվեդիայի հարավում գտնվող Կրունուբերգ նահանգի Յունգբյու համայնքի Կոննա տեղանքում անցյալ գիշեր ամբողջությամբ այրվել է դպրոցի նախկին շենքը, որը նախապատրաստել էին փախստականների ընդունման համար: Այդ մասին շաբաթ օրը տեղեկացնում է ТТ գործակալությունը:

Նրա տվյալներով, շենքում արդեն մահճակալներ եւ ներքնակներ էին տեղադրվել եւ նախատեսված էր  80 ներգաղթյալի տեղավորել այնտեղ: Հրդեհից ոչ ոք չի տուժել: Օրենքի պահապանները շրջապատել են դեպքի վայրը, տեղեկացնում է ՏԱՍՍ-ը: 

Պատահածի վերաբերյալ ոստիկանության վարկածներից մեկը դիտավորյալ հրդեհումն է:  «Հիմքեր կան հենց դա ենթադրելու: Այդ գործը քննվում է   «դիտավորյալ հրդեհում» հոդվածով, -պատմել է քննության ղեկավար Աննա-Լենա Ռինգբական:

Անցյալ հանգստյան օրերին Շվեդիան գերազանցել է փախստականների ընդունման ռեկորդը:  Եթե 1992-ին Բալկաններում պատերազմի հետեւանքով այդ ցուցանիշը կազմել էր 84 018 մարդ, ապա ընթացիկ տարվա մոտ 10 ամիսների ընթացքում այն արդեն հավասար է 86 223-ի: Ինչպես ավելի վաղ հայտնել էր երկրի վարչապետ Ստեֆան Լյովենը,  9,5 միլիոն բնակչություն ունեցող Շվեդիայում ներգաղթյալների ընդհանուր թիվը կարող է կազմել  150 հազար մարդ: Սա Եվրոպայում մեկ շնչին ընկնող ամենամեծ ցուցանիշն է: