Նախընտրելի
Բրիտանական Rolls-Royce ավտոկոնցեռնը ԱՄՆ-ում մի մեքենա է հետ կանչել, գրում է The Financial Times-ը։ 2015 թվի RR Ghost թողարկման մեքենայի հետ կանչման պատճառը անվտանգության կողային բարձիկների հետ կապված խնդիրներն են. դրանցից մեկի վրա սխալ ապրանքանշում է արվել։
Ընկերության աշխատակիցներն այդ թերությունն ի հայտ են բերել մեքենան հաճախորդին հասցնելուց առաջ։ Rolls-Royce-ում հավաստիացրել են, որ սխալ ապրանքանշումը տիրոջ համար որեւէ ռիսկ չի պարունակում, բայց այդ եղանակով կոնցեռնը «իր ուշադրությունն է դրսեւորում մանրամասների նկատմամբ»,-փոխանցում է Lenta-ն։
Մեքենան հավաքվել էր հունվարին անգլիական Արեւելյան Սասեքս կոմսության Գուդվուդի ձեռնարկությունում։ Անվտանգության բարձիկներ արտադրողի անունը չի նշվում։ Rolls-Royce-ն անցյալ տարի 4 հազար նման մեքենա է վաճառել։
Պարբերականը նշում է, որ վերջին տարիներին 12 ավտոկոնցեռն առնվազն 19 միլիոն մեքենա է հետ կանչել անվտանգության բարձիկների հետ կապված խնդիրների պատճառով, իսկ գերմանական Volkswagen-ը ստիպված կլինի 11 հազար մեքենա հետ կանչել բնապահպանական թեստերի արդյունքների կեղծման հետեւանքով։
