նախընտրելի դարձնելԿարին Հովհաննիսյանի եւ Ալեք Մուհիբյանի «1915» հոգեբանական թրիլլերը Վանում անցկացված «Վանա լիճ» միջազգային կինոփառատոնի ժյուրիի հատուկ մրցանակին է արժանացել: Միջոցառմանը ներկա քուրդ եւ թուրք մասնակիցները ֆիլմը ողջունել են բարձր ծափահարություններով:
Ցուցադրության սկզբում ֆիլմը հակասությունների կենտրոնում էր, որովհետեւ տեղի հակահայ հանրությունը քննադատել է փառատոնը եւ սպառնացել է կազմակերպիչներին:
Ֆիլմի գործադիր պրոդյուսերը Հայաստանի նախկին արտգործնախարար, «Ժառանգություն» կուսակցության նախագահ Րաֆֆի Հովհաննիսյանն է: Գլխավոր դերերում հանդես են եկել Սիմոն Աբգարյանը եւ Անգելա Սարաֆյանը: Ֆիլմի երաժշտության հեղինակը Սերժ Թանկյանն է: Ֆիլմը հարգանքի տուրք է մատուցում 1915-ի Հայոց ցեղասպանության զոհերի հիշատակին (այն հնարավոր է ներբեռնել www.1915themovie.com կայքից):
Աղթամարի «Սուրբ խաչ» եկեղեցու մոտ «Van TV»-ին տված հարցազրույցում Կարին Հովհաննիսյանն ընդգծել է. «Սա Հայաստանի թագավորության հոգեւոր եւ խորհրդանշական սիրտն է: Մենք մեզ օտար չենք զգում այս հողում: Մենք մեզ զգում ենք ինչպես տանը»: Քուրդ լրագրողները, իրենց հերթին, հայ ժողովրդից ներողություն են խնդրել քուրդ եւ թուրք ժողովուրդների անունից, գրում է «Asbarez»-ը:
«1915» ֆիլմը ստեղծվել է Ազգային եւ միջազգային հետազոտությունների հայկական կենտրոնի եւ IdeA հիմնադրամի հետ համագործակցությամբ:
