ՆախընտրելիՓարիզի ոստիկանությունը քանդել է գնչուների ճամբարը, որը կառուցվել էր ֆրանսիական մայրաքաղաքի հյուսիսային ծայրամասի լքված երկաթգծերի վրա:
Անցյալ տարվա ամառվանից ճամբարում ավելի քան 350 մարդ էր ապրում: Ինչպես պատմում են տեղի ակտիվիստները, գնչուներից շատերը ճամբարից հեռացել էին մինչեւ ոստիկանական գործողության սկիզբը, տեղեկացնում է BBC-ի ռուսական ծառայությունը:
Ֆրանսիական երկաթուղու ազգային ընկերությունը (SNCF), որին պատկանում է այն տարածքը, որտեղ կառուցվել էր ճամբարը, հրաժարվել է մեկնաբանել իրավիճակը:
Amnesty International իրավապաշտպան կազմակերպությունը փարիզյան իշխանություններին կոչ է արել սառը եղանակը հաշվի առնելով` վռնդված գնչուներին ապահովել ժամանակավոր կացարանով:
1990-երից ի վեր հարյուր հազարավոր գնչուներ են եկել Արեւմտյան Եվրոպա, նրանց հիմնական մասը Ռումինիայից եւ Բուլղարիայից է:
Ֆրանսիան գնչուների նկատմամբ կոշտ քաղաքականություն է վարում եւ կանոնավոր կերպով արտաքսում է երկրից: Նրանցից շատերն ապրում են վրանային ճամբարներում եւ խրճիթներում, որտեղ հաճախ էլեկտրականություն եւ ջրամատակարարում չկա:
