Վարչապետ Հովիկ Աբրահամյանը ներկա է գտնվել Երեխաների սնուցման համաշխարհային 18-րդ ֆորումին: Ողջունելով ֆորումի բոլոր կազմակերպիչներին եւ մասնակիցներին՝ վարչապետը կարեւորել է նման միջոցառումների անցկացումը եւ նշել. «Երեխաները բոլորիս համար մեծագույն արժեք են, իսկ նրանց համար անհոգ եւ արժանապատիվ մանկություն ապահովելը՝ մեր ամենակարեւոր եւ առաջնային խնդիրը: Մանկական սովի դեմ պայքարի եւ երեխաների սնուցման համար ձեր կողմից կատարվող աշխատանքների կարեւորությունը, իսկապես, անգնահատելի է: Մասնակցությունը ֆորումին Հայաստանի համար ունի առանձնահատուկ նշանակություն, քանի որ հնարավորություն է տալիս գնահատել անկախության տարիների ընթացքում անցած ուղին, ինչպես նաեւ ուրվագծել ապագայի առաջնահերթությունները»:

Վարչապետը նշել է, որ այսօր Հայաստանի Հանրապետության բոլոր մարզերում, բացի մայրաքաղաք Երեւանից, գործում է «Դպրոցական սննդի» ծրագիրը եւ ընդգծել, որ ֆորումի շրջանակում եւ դպրոցական այցելությունների ընթացքում մասնակիցներին հնարավորություն կընձեռվի ծանոթանալ հայկական փորձին: «Հայաստանի Հանրապետության կառավարության համար վերջին յոթ տարիների ընթացքում իրականացվող «Դպրոցական սննդի» կազմակերպումը դասվում է առաջնահերթությունների շարքին։ Մենք հետեւողականորեն եւ աստիճանաբար ստանձնում ենք ծրագրի իրականացման պատասխանատվությունը՝ յուրացնելով նաեւ մեր գործընկերների՝ ՄԱԿ-ի Պարենի համաշխարհային ծրագրի եւ Ռուսաստանի Դաշնության ճյուղային սննդի ինստիտուտի նախորդ տարիների ընթացքում կուտակած փորձն ու գիտելիքները։ Ծրագրի շարունակականությունն ու արդյունավետությունն ապահովելու նպատակով կառավարությունը նախատեսում է ընդունել մի շարք ինստիտուցիոնալ որոշումներ, ինչպես նաեւ հանդես գալ օրենսդրական դաշտի կատարելագործմանն ուղղված նախաձեռնություններով»,-ասել է Հովիկ Աբրահամյանը։

Ամփոփելով ելույթը՝ ՀՀ վարչապետը մեկ անգամ եւս ողջունել է ֆորումի մասնակիցներին եւ մաղթել արդյունավետ աշխատանք. «Հուսով եմ, որ ֆորումի շրջանակներում փորձի փոխանակման միջոցով հնարավորություն կունենաք համալրելու ձեր գիտելիքները, ինչպես նաեւ փոխանցելու երեխաների սնուցման ձեր երկրների փորձը, ինչն էլ, իր հերթին, նոր խթան կհանդիսանա մեր հետագա համագործակցության համար: Հուսով եմ նաեւ, որ այս ընթացքում կհասցնեք ծանոթանալ մեր երկրին եւ մշակույթին: Բոլորիդ մաղթում եմ արդյունավետ աշխատանք: Բարո՛վ եք եկել Հայաստան»:

Սեպտեմբերի 5-9 Երեւանում անցկացվող Երեխաների սնուցման համաշխարհային 18-րդ ֆորումին մասնակցում են մոտ 65 երկրներից հյուրեր, այդ թվում՝ նախարարներ եւ բարձրաստիճան այլ պաշտոնյաներ: