Նախընտրելի
Beeline-ի աջակցությամբ այսօր` սեպտեմբերի 6-ին, ժ. 19:00-ին Կոմիտասի անվան կամերային երաժշտության տանը կկայանա «Դասական երաժշտության զարգացման» հիմնադրամի հոգաբարձուների խորհրդի անդամների` Խաչատուրյանի անվան եռյակի երաժիշտների համերգը, որը կազդարարի 2016-2017 թ.թ. համերգաշրջանի մեկնարկը:
Համերգը նաեւ նվիրված է ռուս կոմպոզիտոր Դմիտրի Շոստակովիչի 110-ամյակին: Համերգի ընթացքում կհնչեն կոմպոզիտորի կամերային ստեղծագործությունները` գրված ստեղծագործական կյանքի տարբեր փուլերում: Մուտքն ազատ է:
«Շնորհավորում եմ Խաչատուրյանի անվան եռյակի երաժիշտներին եւ դասական երաժշտության բոլոր սիրահարներին նոր համերգաշրջանի մեկնարկի կապակցությամբ: Այս տարի եւս Beeline-ը շարունակում է երկարատեւ ու արդյունավետ համագործակությունը «Դասական երաժշտության զարգացման» հիմնադրամի հետ: Համոզված ենք, որ նոր համերգաշրջանում կլինեն բազմաթիվ նոր եւ հետաքրքիր միջոցառումներ, որոնք կնպաստեն երաժշտական այս ուղղության զարգացմանը Հայաստանում», - նշեց Հայաստանում Beeline-ի Գլխավոր տնօրեն Անդրեյ Պյատախինը:
Հիշեցնենք, որ «Դասական երաժշտության զարգացման» հիմնադրամը ստեղծվել է Ա. Խաչատրյանի անվան եռյակի երաժիշտների կողմից 2010թ.-ին։ Հիմնադրամի հիմնական գործունեությունն ուղղված է կրթական եւ բարեգործական ծրագրերի իրականացմանը դասական երաժշտության ոլորտում: Beeline-ը հանդիսանում է Հիմնադրամի մշտական գործընկերը 2011թ–ից ի վեր։ 2015-2016 թթ. ընթացքում համագործակցության շրջանակում հիմնադրամը կազմակերպել է բազմաթիվ համերգներ եւ վարպետության դասեր Հայաստանի քաղաքներում, ինչպես նաեւ համերգային շրջագայություններ դեպի Ռուսաստան, Գերմանիա եւ Իսպանիա: Իսկ Վանաձորում բացվել է երաժշտական դասարան երեխաների համար, որտեղ իր վարպետության դասերով պարբերաբար այցելում է եռյակի ջութակահար Կարեն Քոչարյանը:
Խաչատուրյանի անվան եռյակը հիմնադրվել է 1999 թ-ին որպես «Արսիկա»: Մասնակցել է Լոզանում «Schubertiade», Կոստա-Ռիկայում «Festival de las Artes», Մեքսիկայում «Festival International Cervantino» փառատոներին: 2015 թ.-ի ընթացքում տվել են շուրջ 70 համերգ Հայաստանում եւ արտասահմանում` Մեծ Բրիտանիայում, Գերմանիայում, Ճապոնիայում, Լատվիայում, Ռուսաստանում: 2006 թ-ից եռյակը հանդես է գալիս հետեւյալ կազմով` Արմինե Գրիգորյան-դաշնամուր, Կարեն Շահգալդյան-ջութակ, Կարեն Քոչարյան-թավջութակ:
